Construction materials nadawat sa nasunogan

Mokabat sa P8,000 nga kantidad sa construction materials madawat sa mga nanag-iya og balay nga nalakip sa naugdaw sa dakong sunog sa barangay Mantuyong ug Guizo sa dakbayan sa Mandaue.

Si Candida Comaingking sa Mandaue City Social Welfare and Development (CSWD) mipadayag niini sa gihimong pagpakighinabi kagahapon.

Gipasabot niya nga higpit nilang gihashasan ang mga pangalan sa mga nasunogan sanglit ilang namatikdan nga hangtod wala masunogi ang molakip man sa pagpalista.

Dugang pa niya nga ang mga biktima nga nag-abang lamang og panimalay sa maong dapit nga naapil usab sa mga biktima sa sunog makadawat usab og hinabang nga mokabat sa P3,000 ang matag pamilya.

Gikan sa calamity fund sa kagamhanan sa dakbayan sa Mandaue gikuha ang maong salapi nga gipagawas pinaagi usab sa mga sakop sa konseho nga maoy nagdeklarar sa pagpaubos sa state of calamity area sa duha ka barangay nga nasunogan.

Si Comaingking miingon nga nagsugod kagahapong adlawa sa pagluto sa kaugalingon nilang pagkaon ang mga nasunogan sa matag evacuation center nga gipahiluna sa kagamhanan sa maong dakbayan.

Matud pa niya nga niadtong miaging semana maoy ilang gipang-apod-apod ngadto sa mga biktima ang banig ug habol nga maoy ilang magamit sa mga biktima sa ilang evacuation center diin giandam usab ang ilang lutoanan isip temporaryo nilang kusina.

Dugang pa ni Comaingking nga ang mga bugas ug linatang pagkaon nga gidonar gikan sa nagkadaiyang pundok sa katilingban nga nagpuli-puli lang sa pagduaw sa kasamtangang kahimtang sa maong mga biktima.