Mga langyaw mosuporta og politiko ipa-deport: BID

Mga langyaw nga mosuporta sa mga kandidato sa bisan unsang posisyon sa umaabot piniliay ipa-deport sa Bureau of Immigration and Deportation.

Si BID-7 Regional Director Geronimo Rosas misugilon sa Banat News nga dakong kalapasan sa Philippine Immigration Act ang pagsuporta sa usa ka langyaw sa usa ka kandidato sa eleksiyon dinhi sa nasud sa bisan unsang posisyon ilabi na ang pag-apil-apil sa kampanya.

Ang makalapas niining maong balaod silotan pinaagi sa pagpa-deport balik sa ilang nasud ug mahimutang na sa blacklist sa tanang buhatan sa imigrasyon sa nasud.

Gumikan niini, posibleng si BI Commissioner Alipio Fernandez mohatag og kamanduan sa pag-monitor sa tanang mga langyaw nga ania sa Sugbo nga posibleng malambigit sa kalihukan sa politika.

Hinuon, hangtod ning pagbalita wala pa makadawat og taho ang buhatan sa imigrasyon sa Sugbo sa mga kalihukan sa mga langyaw nga naglambigit sa politika.

Gumikan niini, giawhag ni Rosas ang katawhan nga kun duna kini mamatikdang langyaw sa ilang dapit nga nalambigit sa kalihukan sa politika andam niyang dawaton ang impormasyon ug kini isipon nga 'confidential' tali sa impormante ug sa mga sakop sa imigrasyon.