Charger hinugdan sa sunog

Tungod lang sa charger sa cellphone nga mibuto usa ka panimalay ang hingpit nga naugdaw kagahapon sa hapon diha sa Sitio Ponce Hills, Capitol ning dakbayan sa Sugbo. Samtang didto sa Dalaguete, Cebu deriyot maugdaw ang usa ka panimalay human dunay nibuto nga maoy sinugdanan sa kalayo.

Ang unang panimalay nga naugdaw gipanag-iya ni Generosa Rabaya, 50, minyo, residente sa Ponce Hills, Capitol ning dakbayan.

Ang alarma nadawat sa kabomberohan 1:31 ug nakontrolar sulod sa upat ka minuto nga gipaubos sa first alarm.

Si Cebu City Fire Marshal Supt. Ismael Codilla nga nahinabi sa Banat News mibana-bana sa danyos mokabat sa P50,000.

Nagtuo si Codilla nga basin dunay wire sa kuryente sa sulod sa panimalay nga gabukon nga posibleng gisubayan sa kalayo.

Atol sa sunog si Generosa nga nahinabi sa Banat News mitug-an ang iyang umagad babaye nga si Gemma nag-charge sa cellphone pasado alas 12 sa udto.

Matud ni Generosa iya gyud nga nakit-an ang charger nga nagkonektar sa cellphone kalit lang mikayo ug dali kining mikuyanap sa bongbong hangtod nga midako.

Si Michael, anak ni Generosa nakaangkon og paso sa tuong abaga ug bukton human gidali pagluwas niini ang dos-anyos nga pag-umangkon.

Ang duha ka apo ni Generosa nga si Mary-Ann ug Estipano daling giluwas sa uyoan.

Walay bisan usa ka butang na-recover gawas lang sa ilang sapot.

Samtang didto sa Saksak, Dalaguete usa ka panimalay ang nasunog kagahapon sa kaadlawon.

Si FO1 William Tabasa sa Dalaguete nga nahinabi sa Banat News miila sa tag-iya sa panimalay nga nasunog iya ni Leoncia Delagon ug sa kapuyo nga si Romulo Bilar.

Nadawat ang alarma 1:20 sa kaadlawon ug mikabat sa P200,000 ang danyos.

Matud ni Tabasa ang nahabilin sa panimalay ang anak lalaki ni Bilar nga si Gabriel nga maoy nagpuyo sa panimalay.

Dugang pang Tabasa si Gabriel gikan milakaw og hubog nga miuli sa ilang balay ug dangta'g pila ka minutos iyang giadto ang iyaan nga si Rebeca ug nagpahibalong nasunog.

Daling gisusi ni Rebeca ang balay apan iyang nakita nga walay nag-aso hinungdan nga mibalik na lang siya sa balay.

Matud ni Tabasa pagka taudtaod nakadungog si Rebeca og usa ka buto ug diha-diha nakita sa iyaan nga nagsugod na og dilaab ang kalayo.

Ang iyaan daling nakatawag sa guwardiya sa Public Market Association ug mao nay nagpahibalo sa kapolisan.

Sa pagkakaron si Tabasa dili pa makonpirmar sa hinungdan kun diin magagikan ang pag-ulbo sa kalayo ug kun wala ba kini tuyoa sa pagsunog samtang nagpadayon pa ang gihimong imbestigasyon.