Batan-on sikop sa ronda

Usa ka 18-anyos nga lalaki nga tinu-an sa 3rd year high school ang nadakpan nga nagsuyop og shabu sa gihimong saturation drive sa kapolisan sa Danao ug Provincial Drug Enforcement Agency (PDEA) 7 sa miaging gabii diha sa Poblacion Danao.

Nagtingkagol karon diha sa Danao police detention cell si Marlo Almerez Ramonida nagpuyo sa Tuburan Sur sa maong siyudad kinsa giingong naaktohan sa mga polis nga nagsuyop og shabu diha sa silong sa balay sa usa ka "Paking".

Si Ramonida nasakmitan sa mga polis og usa ka paketeng shabu.

Ang saturation drive gipangulohan ni SPO2 Felix Matbagon, SPO1 Nilo Pantoja, PO3 Winrie Laurel uban sa mga sakop sa PDEA.

Si SPO3 Edgar Gomez nagkanayon nga ang maong operasyon gihimo sa kapolisan human sila nakadawat og tawag gikan sa usa ka concerned citizen nga dunay usa ka tawo ang naghingos og shabu diha sulod sa balay sa ginganlan og "Paking".

Matud ni Gomez si Romonida nag-inusara dihang naabtan sa kapolisan.

Si Ramonida gipasakaan na sa kapolisan og tukmang kaso sa piskaliya.