'Pareglahan sa frat patay

Patay ang usa ka 27 anyos nga lalaki human pusila sa grupo sa mga batan-ong miyembro sa Beta Gamma Rho fraternity sa miaging gabii sa sitio Lutao, Estaca Compostela.

Patay nang nadangat sa Danao District Hospital ang biktimang giila sa kapolisan nga mao si Allan Pareja, ulitawo, residente sa Tamiao kinsa nakaangkon ug duha ka samad pinusilan sa iyang walang dughan sa wala pa matinong kalibre sa armas.

Ang gitumbok nga mga suspetsado kinsa nadakpan sa hot pursuit operation sa kapolisan pinangulohan ni Insp. Ramon Lacno mao sila si Jessie Reynes, 21, nagpuyo sa Estaca, Zandy Sotero 18, nga taga Guiwanon ug ang duha ka menor de edad nga nagpangidaron og 16 ug 15, residente sa Guiwanon.

Si Noel Tidoy, 19 ulitawo, residente sa Estaca maoy bugtong nakaikyas atol sa hot pursuit operation.

Si SPO3 Quirino Vasquez nga nahinabi sa Banat News nagkanayon nga ang biktima uban sa laing tulo ka wala ilhing mga higala nanglakaw sa nahisgutang dapit.

Ang mga gikatahapan giingong nibabag sa agianan sa biktima ug sa kauban niini.

Usa sa gikatahapan midapog sa nawong sa biktima samtang ang laing kauban sa gikatahapan mibunot ug armas dayong pusil kaduha ka higayon tumong gyud sa dughan niini.

Ang tulo ka wala ilhing kauban sa biktima naglumbaanay ug panagan palayo sa nahitaboan.

Gisuwayan unta og dala ang biktima sa tambalanan apan gideklarar sa mga doktor nga patay nang niabot.

Sa gihimong pakisusi sa kapolisan nakuha sa crime scene mao ang brown nga paresan sa tsinelas ug usa ka bato nga dunay daghang dugo.

Nagtuo si Vasquez nga ang bato nga nakuha posibling gigamit kini sa mga suspetsado. Ang kapolisan padayon pang nangita kang Tidoy nga gituohang wala pa makalayas sa laing dapit.

Ang upat ka nadakpan kinsa anaa sa detention cell gipailawon sa paraffin test sa pagtino kung si kinsa kanila ang nakapabuto ug pila ka armas ang gigamit.

Giandam na sa kapolisan ang tukmang kaso nga ipasaka batok sa upat ug lakip sa nakaikyas.

Samtang sa laing bahin, nasamdan ang usa ka sakop sa Tau Gamma Phi fraternity human kini pusila sa grupo sa mga batan-ong gidudahang sakop sa gang diha sa dalan Sanciangko sa Parian kagahapon sa hapon.

Ang nasamdan sa iyang tuong bitiis mao si Rocky Rodriguez, residente sa dalan Simuon sa maong barangay kinsa misuway og gukod sa mga batan-ong migukod usab sa iyang manghod nga si Robert.

Apan nakugang na lang si Rocky dihang siya maoy gipusil sa usa sa mga suspek. Si Rocky daling gidala sa Cebu City Medical Center samtang nakaikyas usab ang mga suspek.