Suspek sa tulis sa PUJ sa Tisa mitahan sa kapolisan

Usa sa duha ka suspek nga nakaikyas human manulis og usa ka PUJ diha sa dalan Tisa niadtong milabay'ng semana mitahan sa kapolisan tungod sa kahadlok nga maparehas sa kaubang napatay sa mga mirespondeng polis.

Si Jonas Abanes,18, alyas Angel taga sitio B. Callejon, dalan Katipunan sa Labangon inubanan sa iyang inahan nga si Violeta mitahan diha sa panimalay ni kanhi Konsehal George Rama kagahapon sa kaadlawon.

Si Abanes maoy kauban ni Francis Joel Romero Logapis nga napatay sa grupo nila ni Sr. Inspector George Ylanan sa Vice Control Section ug PO1 Mark Manlosa sa Traffic Group nga nakaresponde sa pagtulis sa PUJ diha sa may La Paloma Village sa Tisa niadtong Huwebes sa gabii.

Sa report sa kapolisan, nasuta nga upat ka pasaherong sila si Marlon Abella, 23, Rosco Cabredo, 22, Paping Alconton, 45, ug Loreto Tabares, 35, ang gikatahong gitulis sa tulo samtang nagluwan og PUJ nga may plakang GVT-521.

Nakuha gikan kang Abella ang iyang bracelet nga balor og P1,500, usa ka silver nga singsing usab nga balor og P600 ang nakuha kang Cabredo samtang ang duha ka mga cellphone iya nila ni Alconton ug Tabares.

Sa report sa DyAB niadtong Biyernes miangkon ang usa sa mga pasaherong si Abella nga nakailog kini sa usa ka kalibre .38 rebolber sa mga suspek hinungdan nga nayagaw ang grupo ug nangikyas. Si Abella nagkanayon nga mipasalba pa siya makausa ngadto sa nanagang mga suspek apan wala matino kung dunay naigo niini.

Apan sa paghuman sa butobuto nasuta nga naigo na si Logapis diha sa tiil ug dughan, patay na kining midangat sa Cebu City Medical Center.

Si Abanes mitahan sa grupo ni SPO3 Alejandro Lopez sa Theft and Robbery Section ug gikatakdang pasakaan na og kasong pagpanulis. Gitug-an usab ni Abanes kung si kinsa ang laing usa nga nakaikyas ug giila niyang si Arbee Gica Labuana nga iyang silingan.

Sumala pang Abanes nga atol sa ilang pag-ikyas, si Logapis ray mibuwag kanila og misubay kini sa dakong dalan samtang sila ni Labuana misuot-suot sa kabalayan sa sitio Bliss, hinungdan nga sa Logapis napatay. -- Edwin Ian Melecio