Papa, anak naangol

Grabeng naangol ang usa ka amahan kuyog sa 9 anyos niining anak human ang motorsiklo nga ilang giluwanan kalit lang nadumbol sa nag-parking nga delivery truck sa softdrink nga sakyanan sa dalan UN Avenue, Alang-Alang, Mandaue ala 1 pasado ang takna sa miaging kaadlawon.

Si SPO3 Vicente Benabaye, chief investigator sa Mandaue Police Traffic Section, miingon nga grabeng naangol mao sila si Rogelio Bacalso, 44, minyo ug ang anak niining si Justine Bacalso nga taga dakbayan sa Sugbo.

Dugang pa ni SP03 Benabaye nga ang drayber sa delivery truck nga si Allan Monte maoy dali nga nakatabang sa mga biktima ug gidala niini sa Mandaue City District Hospital.

Subay sa imbestigasyon, nasayran nga nagdagan subay sa maong dalan ang motorsiklo nga giluwanan sa mga biktima ug paghidangat sa maong dapit kalit lang nadumbol sa delivery truck.

Ang drayber sa maong delivery truck nga si Allan Monte miingon nga nag-ilis lamang siya og sapot sa sulod sa ilang panimalay dihang kalit nabati niini ang kusog nga paglagubo sa gawas.

Dali niining gisusi ug maoy napalgan ang mga biktima nga nagbuy-od na sa daplin sa karsada uban sa motorsiklo nga nalamba tupad sa gimaneho niining delivery truck.

Si SPO3 Benabaye miingon nga ang amahan nga si Rogelio maoy nakabaton og dakong kadaut sa iyang kalawasan ug ang anak niini nga si Justine nakabaton usab og mga bun-og sa iyang kalawasan.