Dalagita napusilan

Usa ka 16 anyos nga dalaga napusilan og de bomba samtang nanglaba sa puso sa dihang ang grupo sa mga batan-on namusil og langgam apan ang batan-on mao hinuon ang naigo ug nalandig sa tambalanan.

Nahitabo ang insidente pasado alas 4 sa miaging hapon sa Sitio Curvada, Banigan, Badian.

Unang gidala sa Badian District hospital apan gibalhin sa tambalanan sa dakbayan sa Sugbo ang biktimang si Arlene Velarde, tinun-an sa 4th year sa Badian National High School ug nagpuyo sa nahisgutang lugar ug nakaangkon og samad pinusilan sa iyang ilong agi sa de bomba.

Ang gitumbok nga nakapusil sa biktima mao si Jojo (tinuod nga ngalan gipugngan), 17-anyos ug nagpuyo ra usab sa maong lugar, uban sa iyang mga kauban ang laing tulo ka minor de ead.

Base sa imbestigasyon ni PO2 Redeemer Abendan ug PO1 Purtonato Porgatorio ang biktima nanglaba sa puso duol sa kawayan, samtang ang suspek nga nagdala og de bomba namusil og langgam nga "kurokurok".

Si Jojo nga maoy nagdala sa de bomba wala makabantay sa biktima nga nanglaba duol sa ilang nahimutangan, sa dihang dunay gitirahan nga langgam wala kini makaigo ug ang biktima hinuon ang naigo sa bala.

Ang upat ka mga batan-on wala na madakpi sa miresponding kapolisan human makaeskapo palayo sa dapit.

Si PO3 Efren Caballero nga nahinabi sa Banat News miingon posibling dunay panagsabosabot human ang ginikanan sa suspek mipadayag nga amdam moabaga sa galastuhan sa ospital.