Summit dakong trabahuon

Giangkon sa bag-ong milingkod nga hepe sa Mandaue City Police Office Sr. Supt. Alexander Abadinas nga dako ang trabahuon nga iyang sagubangon sa nagsingabot nga ika-12 nga Asean summit sunod semana.

Matud pa ni Abadinas kagahapon atol sa pormal niyang pag-asumir sa katungdanan, nga dako ang iyang pagsalig sa iyang mga opisyal sa kapolisan sa Mandaue gumikan kay ang tanang mga kinahanglan og mga tahas niini naka-establisar na alang sa seguridad sa mga delegado ug wala nay angayan pang usbon.

Iya na usab nga gimanduan ang mga hepe sa kapolisan nga anaa mahimutang ang bag-ong kahimanan, street lightings ug mga nindot nga tanom alang sa Asean summit nga bantayan kini 24 oras aron malikayan nga kawaton sa mga badlongon sa Mandaue.

Atol sa flag ceremony kagahapon sa buntag, si Abadinas pormal nga gipaila ni Mandaue City Mayor Thadeo Ouano sa mga kawani sa Mandaue nga maoy bag-ong OIC director sa MCPO ug naghinaot sa iyang kalampusan sa natad sa seguridad sa nagsingabot nga Asean summit.

si Abadinas lakip unta sa pilian ni Ouano sa lima ka mga ngalan nga misumiter sa Police Regional Office-7 nga ihulip kang Sr. Supt. Eduardo Catabas human si Ouano misuwat kang PRO-7 Director Silverio Alarcio Jr. nga pahulipan si Catabas sa iyang posisyon sa milabay'ng semana human sa pipila ka mga paltos nga nahimo sa iyang pagdumala sa MCPO.

Si Abadinas nahimong direktor sa PRO 7 Police Community Relations ug bag-ohay lang na-promote sa iyang ranggo gikan sa pagka-Superintendent ngadto na sa pagka-Senior Superintendent niadtong Oktubre ning tuiga.