Kalunasan city jail napuno

Bag-ong prisohang gibalhinan sa mga priso sa Bagong Buhay Rehabilitation Center diha sa Kalunasan napuno na human sa pagbalhin sa 230 kapin pa ka mga priso kagahapon sa buntag.

Si Chief Insp. Gil Inopia, ang deputy jailwarden sa BBRC mitug-an sa Banat News nga temporaryo una nilang gihunong ang pagbalhin sa mga priso kagahapon sa udto tungod kay wala nay kabutangan ang mga priso.

Ang gibalhinang duha ka andanang edipisyo sa Kalunasan mas arang-arang kung itandi sa karaang BBRC tungod kay mas mabantayan ang mga priso ug dili sama kahuot sa ilang gigikanan.

"Amo pang gipanid-an ang sa taas kay puno-puno na ang facility, gi-identify pa nato kung pwede ng butangan ang bag-ong building (tupad nga edipisyo)," asoy pang Inopia.

Ang maong mga pasilidad nga mikabat og P30 milyones nga budget proyekto sa BJMP ug Philippine Drug Enforcement Agency alang niadtong mga prisong may kaso sa ilegal nga drugas.

Sumala pang BJMP officer-in-charge, Chief Supt. Antonio Cruz nga gikahinabi sa Banat News 60 ngadto sa 70 ka porsiyento sa mga prisong naa sa BBRC nalambigit sa drogas.

Duna pay kapin 1,000 ka mga priso sa karaang BBRC sa pagkakaron ug wala pa matino kung kanus-a sila mabalhin sanglit wala pa usab matagna kung kanus-a mahuman ang ikaduhang edipisyong may upat ka andanang gihimo diha sa bag-ong pasilidad sa Kalunasan.

Sa pagkakaron, ang tubig gihapon ang problema sa bag-ong prisohan. Nunot niini, girasyon lang sa BJMP ang tubig sa matag selda alang sa 40 ka mga priso.

Ang selda sumala pang Inopia may gidak-ong unom ka metro kwadrado, dunay kaugalingong kasilyas ug banyo diin dunay drum nga punduhanan og tubig.

Hinuon wala pay nadunggang reklamo gikan sa mga prisong gibalhin kini bisan paman mipasidaan na silang (priso) posibleng dunay mahitabong kagubot kung magkaproblema sa tubig.

Samtang giklaro ni Inopia nga sayop ang migawas nga balitang dunay naangol atol sa insidente sa noise barrage niadtong milabayng gabii, nagsugod ang kagubot dihang dunay mipasiatab og tabi-tabi nga lisod ang kahimtang sa gibalhinang prisuhan.

Upat ka mga priso nga sila si Allan Mosqueda, Obet Hegremosa ug Erwin Suico maoy gitumbok nga nagpasiatab sa maong estorya hinungdan nga wala mopatuo ang mga priso sa mga jailguards.

Laing priso nga si Noe Padayao ang gibutang usab sa isolation cell human niini sunoga ang blackboard sa maong prisuhan nga gisugnuran usab sa uban og mga banig, habol ug mga unlan samtang ang uban gipamuak ang mga suga.