Dalaga gidunggab patay

Nabulit og samad dinunggaban ug namatay ang usa ka dalaga human kini dunggaba sa iyang gireklamo sa barangay samtang ang biktima nagtan-aw og telebisyon sa iyang silingan diha sa Panaghiusa sa Duljo-Fatima ning dakbayan niadtong milabayng gabii.

Ang nakabsan sa kinabuhi giilang si Reah Manibog, 21, residente sa nahisgutang dapit samtang gitabang diha sulod sa emergency room sa Cebu City Medical Center.

Ang suspek giilang si Felix Abadilla,44, ug silingan sa biktima kinsa dali usab nga miikyas human sa pagpanunggab.

Sa imbestigasyon sa Homicide Section, ang biktima kasamtangang nalingaw nga nagtan-aw og telebisyon sa tindahan sa usa ka giilang si Nicolas Abella diha sa maong dapit dihang miabot ang suspek nga armado og kutsilyo.

Ang dalaga wala na makapanagang dihang kalit nga gitusak-tusak og dunggab sa suspek diha sa liog, likod ug mga bukton, dihang samdan na si Manibog daling midagan ang suspek ug wala na maabti sa mga mirespondeng polis.

Nasuta sa kapolisan nga di palang dugay gireklamo sa biktima ang suspek diha sa barangay diin sila gihusay diha sa Lupon ng Tagapamayapa ug mao karoy gituOhang motibo sa suspek sa pagpatay sa biktima.