Tawo mipilit sa skywalk

Mipilit sa atop sa skywalk ang usa ka tawo human kini makuryentehe atol sa pagbutang og mga parol sa A.C. Cortes Avenue duol sa unang taytayan sa Mactan ug Mandaue sa milabay'ng gabii.

Ang biktima mao si Fernando "Dondon" Gadiano, 27, ulitawo nga nagpuyo sa Paknaan, Mandaue nadala sa tambalanan tungod sa kadaot nga naangkon sa iyang lawas.

Base sa pamahayag ni FO2 Cepriano Codilla Jr. sa Mandaue City Fire Station, si Gadiano trabahante sa gikontrata sa kagamhanang lokal sa Mandaue nga maoy mamutang og mga parol sa kadalanan.

Sa milabay'ng gabii atol sa pagtaod ni Gadiano og mga dayandayan nga parol sa skywalk sa A.C. Cortes Avenue duol sa University of Cebu - Lapulapu and Mandaue, iyang nasabod ang high tension wire sa Visayan Electric Company nga nagkutay duol sa atop hinungdan nga nalagpot kini ug mipilit sa atop sa skywalk.

Ang kabomberohan sa Mandaue nagpadala og fire ladder aron sa pagkuha ni Gadiano kinsa daling gidala sa Cebu Doctor's Hospital.

Hinuon, matud pa sa mga opisyal sa Mandaue nga mohatag sila og hinabang financial ngadto sa biktima nga anaa pa karon sa maong tambalanan gumikan kay nahitabo kini atol sa iyang trabaho.

Ang mga parol nga makita sa nagkadaiyang kadalanan sa Mandaue lakip kini sa beautification project nga gipangulohan ni Mandaue City First Lady Linda Ouano alang sa nagsingabot nga Asean Summit. - Uban sa report ni Romeo T. Limpangog