Jonkie 2007 sa Mandaue gilusad

Nagsugod na ang kisaw sa politika sa dakbayan sa Mandaue human si Thadeo Jovito "Jonkie" Ouano ug mga kauban sa partido pormal na nga mipahibalo sa ilang movement alang sa 2007 nga eleksiyon.

Ang maong pagpahibalo sa kandidatura sa kamanghurang anak ni Mayor Thadeo Ouano natigayon atol sa kasaulogan sa kasumaran sa adlaw'ng natawhan niini niadtong Nobiyembre 16 sa gabii.

Gihimo ang pagdeklarar human usab sa pormal nga pagduso sa mga Council of Elders kang Jonkie nga mayoralty candidate sa 2007 election uban sa mga sakop niini sa konseho nga kandidato isip Power Team 4.

Si Konsehal Glenn Bercede ug Konsehal Jonas Cortes maoy gipilian nga kandidato alang sa bise mayor sa partido ni Jonkie ug si Konsehal Pontico Carlo Fortuna mao usab ang usa sa mga kandidato nga provincial board sa ikaunom nga distrito.

Si Jonji Gonzales, media consultant ni Ouano nga gikahinabi sa Banat News miila sa kandidato alang sa pagka konsehal sa partido ni Jonkie.

Naglakip kanila mao sila si Kapitan Editha Cabahug sa Look, Kapitan Alfredo C. Ouano, Tabok barangay kapitan Emiliano Rosal sa Tabok, dean sa kolehiyo Dr. Noelen Borbajo, magpapatigayon Bethoven Andaya, Jefferson Ceniza, Dodong Albano, Atty. Raul Sanchez, kanhi konsehal sa dakbayan Kiwi Soon ug incumbent City Councilor Procopio Villanueva.

Si Kapitan Cabahug asawa ni Konsehal Raul Pokang Cabahug, si Dr. Borbajo asawa ni Konsehal Allan Borbajo kinsa pulos na anaa sa ilang katapusang termino.

Samtang si Jefferson Ceniza anak ni Konsehal Dionesio Ceniza nga anaa usab sa katapusang termino ug si Dodong Albano anak usab ni kanhi Konsehal Alfonso Albano.