Gitigbas, giluba patay

Patay diha-diha ang usa ka 28-anyos nga lalaki human kini tigbasa ug lubaa sa iyang kainom niadtong Biyernes sa hapon diha sa Sityo Madrisuba, Barangay Kabac lungsod sa Bantayan.

Sundang ug kutsilyo ang gigamit sa suspetsado sa pagpanigbas ug pagpangluba.

Ang biktima giila sa mga polis nga si William Villarino, residente sa maong lugar.

Si Villarino nakaangkon og mga samad tinigbasan ug dinunggaban sa tibook niyang lawas nga gituhoan nga maoy hinungdan sa iyang kamatayon.

Nasikop dayon sa mga Barangay tanod sa lugar si Ben Pampanga 37, residente usab sa nahisgutang Barangay ug gitugyan sa kapolisan sa Bantayan ug nasakmit usab ang sundang ug kutsilyo nga gikatahong maoy gigamit niini sa pagluba ug pagtibas ni Villarino.

Si PO3 Roberto Mangubat polis sa Bantayan mibutyag kagahapon sa Banat News nga si Pampanga ug Villarino nag-inom sa wala pa mahitabo ang insidente.

Kalit nga nagkalalis ang duha nga maoy hinungdan sa hitabo.

Si Mangubat midungag nga giandam na ang mga dokumento para sa idusong kaso batok ni Pampanga.