Pasahero milayat sa barko

Usa ka pasahero milayat gikan sa barkong giluwanan diha sa may Hilotongan channel samtang naglawig padulong sa Talibon, Bohol niadtong milabay'ng gabii, ang biktima wala na igkita sa mga rescuers.

Sumala pa ni Lt. Junior Grade Paulo Abejuela sa Philippine Coast Guard-Cebu Station kinsa maoy lider sa Special Operations Group nga nangita sa biktima tibuok kaadlawon miila sa biktima nga si Estephanof Torefiel, 19, taga Talibon.

Matud pang Abejuela, kauban sa biktima ang iyang inahang si Emma Torefiel padulong na pauli sa ilang lugar sakay sa MV Ara nga gikapitanan usab ni Pedro Alimpulos.

Sumala pa sa report nga nadawat sa PCG-Cebu nga milawig ang barko gikan sa Pier 3 alas 10 sa gabii padulong na unta sa Talibon.

Apan gikatahong pag-abot sa Hilotongan channel, 1.5 nautical miles gikan sa labing duol nga baybayon sa lungsod sa Cordova pasado alas 11 na sa gabii sa wala mahibaw-ing hinungdan milayat ang biktima diha sa barko.

Matud pang Abejuela, daling gialarma sa mga tawo ang mga tripulante sa barko kabahin sa paglayat sa usa ka pasahero hinungdan nga ang kapitan nga si Alimpulos daling mimando nga ibalik ang barko aron pangitaon si Torefiel.

Gikatahong pasado ala-una na sa kaadlawon naabot ang mensahe diha sa buhatan sa PCG-Cebu station kabahin sa insidente hinungdan nga miadto dayon ang grupo ni Abejuela pagpangita sa pasahero sa maong dagat.

"Past one (o'clock) na sila nanawag, silay unang ni-conduct og search and rescue operation kay ila man gituyokan pero wala man nila makit-i maong nipadayon nalang sila," asoy pang Abejuela.

Ang PCG-SOG mihunong sa ilang pagpangita pasado alas 6 na sa buntag apan padayon pa gihapon ang pagpaniid sa mga dapit sa maong dagat.

Matud pang Abejuela wala sila masayod kung kahibalong molangoy ang biktima apan dako ang ilang pagtuong gianod na kini sa sulog sa dagat.

"Most probably naanod to siya kay wala man tay idea kung swimmer ba to siya, wala man sad mohatag og detalye ang inahan kay nag-concentrate lang man sa pagpangita," asoy pa sa opisyal.

Ang Hilotongan channel dunay gilay-ong duha ka milya gikan sa Pier Uno sa dakbayan sa Sugbo.