Misulay'g rape sa bata gitigbas patay

Usa ka tawo nga gipasanginlang misulay og lugos sa 11 anyos apan nakalayas napalgan na lamang nga patay na human kini mabiktima sa pagpanigbas.

Ang biktima mao si Melquiades Briones, 55, nga lumad nga taga Siaton, Negros Oriental ug temporaryong nagpuyo sa Purok Tambis, Umapad, Mandaue.

Sa nasayran sa Banat News sa taho nila ni PO2 Renato Alondres ug PO2 Vicente Gila sa kapolisan sa Presinto 5 nga si Briones giingong nasakpan sa kabanay sa batang babaye dihang himuon unta ang pagpanglugos niini.

Ang pagpanglugos nahitabo sa miaging semana sa kasagbutan sa ubos nga bahin sa Marcelo Fernan Bridge sa Umapad, Mandaue.

Gisang-at sa mga ginikanan sa biktima ang kasong pagpanglugos ngadto sa Opao Police Station nga maoy hinungdan nga kini milayas.

Apan dihang mipauli si Briones sa ilang panimalay kagahapon sa kaadlawon namatikdan kini sa kalalakin-an nga mga estambay ug gitabangan sa pagkulata ug pagpanigbas hangtod nga namatay.