Sikyu nakakita sa bomba gipasidunggan

Guwardiyang nakadiskubre sa gitanom nga bomba sa gituohang mga sakop sa Rajah Sulaiman Movement niadtong Mayo 11 sa gabii diha sa entrance sa usa ka dakong department store diha sa North Reclamation Area gihatagan og pasidungog kagahapon diha sa buhatan sa Police Regional Office 7.

Si Bienvenido Bonan,Jr., nga sakop sa Maya Security and Investigation Agency Incorporated gihatagan og pasidungog sa Philippine Association of Detective and Protective Agency, Operators (PADPAO), Incorporated sa ilang sangang buhatan dinhi sa rehiyon.

Ang pasidungog gibase sa maayo ug kumpleto niining gihatag nga impormasyon ngadto sa mga mirespondeng mga polis nga miresulta sa pagkapatay sa duha ka mga gidudahang miyembro sa RSM nga sila si Ali Usop alyas Alex ug Datu Neil Ulama alyas Viktor Jimenez niadtong gabhiuna diha sa dalan A. Soriano.

Ang duha matud pa sa kapolisan misukol dihang gisitar sa mga sakop sa Vice Control Section, Criminal Investigation and Intelligence Branch ug mga sakop sa Special Weapons And Tactics.

Usa ka improvised explosive nga gikan sa usa ka rifle grenade nga may timer, butane gas ug wirings nga gisulod sa usa ka kahon diha sa pultahan sa maong department store ang nadiskubrehan ni Bonan.

Matud pa sa mga eksperto ang maong bomba susama sa mga "trademark" sa mga bombang ginama sa grupong RSM.