Iladong pusher 'sikop

Iladong pusher sa ilegal nga drugas nasikop sa kapolisan atol sa buy-bust operation didto sa Sitio Pilapil, Umapad, Mandaue sa milabay'ng gabii.

Ang nasikop mao si Gilbert Vate, 30, ug nagpuyo sa maong dapit ug ilado na kaayo nga mamaligyaay og shabu.

Matud pa ni Insp. Leoncio Baliguat, hepe sa Station 5 sa Mandaue City Police Office nga dugay na nilang gipanid-an si Vate sa pagpayuhot og shabu hinungdan nga ilang nahimo ang buy-bust operation mga alas 7:05 sa milabay'ng gabii.

Atol sa maong operasyon sa mga elemento sa Station 5 si Vate buot unta nga molighot sa mga operatiba apan nakorner kini ug nasikop.

Nakuha gikan kang Vate ang 18 ka gagmay'ng pakete sa gituohang shabu, mga kagamitan sa pagsuyop ug ang buy-bust money nga balor P200.

Ang mga ebidensiya ila nang gisumiter sa PNP Crime Laboratory ug si Vate gitanggong na sa kapolisan sa Station 5 samtang giandam na ang pagpasaka og kasong kalapasan sa Akta Republika 9165.