2 ka Bol-anon gipusil sa guwardiya

Duha ka Bol-anon gipamusil sa guwardiya nga ilang gikainom nga maoy hinungdan sa grabe nilang pagkaangol.

Ang pagpamusil nahitabo alas 3 pasado ang takna sa miaging kaadlawon sa FF Cruz sa Reclamation Area, Subangdaku, Mandaue.

Ang mga biktima mao sila si Marcelino Taypin, 29, ug Edgar Tutor, 19, pulos ulitawo ug lumad nga taga Humay-Humay, Ubay, Bohol ug stay-in worker sa BG Logistic nga nahimutang sa maong dapit sa Mandaue.

Si Leonardo Carticiano, 30 anyos, ulitawo nga lumad nga taga Moalboal ug stay-in nga guwardiya sa maong establisamento nga gitrabahoan sa mga biktima maoy suspetsado nga nagpusil kanila.

Ang mga biktima dali nga gidala sa Mandaue City Hospital ug padayon kining giatiman sa mga doktor.

Si SPO1 Emmanuel Enople sa kapolisan sa Presinto 2 sa Subangdaku Police Station nga gikahinabi sa Banat News miingon nga nag-inom ang biktima ug ang suspetsado sa wala pa mahitabo ang pamusil.