Hapsay ang pagbukas sa klase

Hapsay ug walay dagkong panghitabo ug problema nga nasinati ang mga opisyal sa DepEd ug kapolisan dinhi sa lalawigan sa Sugbu may labot sa pormal nga pagbukas sa klase kagahapon.

Kini maoy gibutyag ni Cebu City Schools Division Superintendent Dr. Leonilo Oliva sa pakighinabi sa mga tigbalita kagahapon human sa paglibot sa maong opisyal sa mga tunghaan sa elementarya ug high school sa dakbayan.

Matud pa ni Oliva nga bisan paman nga sayo pa kaayong gipahibalo nga kinahanglang mosayo og pa-enroll ang mga ginikanan sa ilang mga anak duna gihapoy nga "late enrollees" nga mitungha kagahapon.

Apan aron di mabalda ang klase mibutang og action center ang matag tunghaan nga maoy moatiman sa maong mga tinun-an nga matud pa ni Oliva gikan pa sa bakasyon, ang uban nasakit ug ang uban mao pay higayon nga nahatagan og pagtagad sa ilang mga ginikanan.

Gipaabot nga mosaka og dos porsiyento ang gidaghanon sa mga tinun-an karong tuiga.

Samtang ang Cebu City Police Office nga mipakatap og mga polis sa mga tunghaan sa dakbayan mihulagway nga walay dagkong panghitabo kagahapon gawas lang sa pagdasok sa trapiko nunot usab sa kadaghan sa mga tinun-an.

Ang direktor sa Police Regional Office Chief Supt. Silverio Alarcio mipahibalo kagahapon nga walay naabot sa iyang atensyon nga dagkong di maayong panghitabo sa iyang hurisdiksyon kagahapon.

Apan mimando og dugang mga polis diha sa kadalanan ilabi na duol sa mga tunghaan.