Manghod nagselos sa uyab sa igsuon mipatay

Selosong manghod mipusil sa hinigugma sa iyang maguwang diha sa Villagonzalo Uno, Tejero ning dakbayan kagahapon sa kaadlawon.

Duha ka samad pinusilan sa wala ug tuong dughan ingon man tuong bukton ang nahiaguman sa biktimang si Danilo Casinillo Jr., 29, human kini giatangan ug gisugat og pusil sa suspek nga si Lemuel Bargamento, hingkod ang panuigon ug molupyo sa maong lugar.

Sumala pa sa imbestigasyon sa Homicide Section, ang biktima uban sa uyab niining si Elsa nga igsuon sa suspek naglakaw pauli gikang mitambong og birthday party sa kauban sa trabaho sa babaye.

Ang duha nga nasayod na sa pagkaseloso sa igsuon sa babaye, wala magtupad og lakaw, si Elsa sa pikas tampi samtang si Casinillo diha sa pikas tampi sa kalsada.

Apan kalit lang nga gisugat ni Bargamento si Casinillo ug gipusil gamit ang wala matinong kalibre sa armas makadaghang higayon ang biktima.

Kritikal nga gidala sa amahang si Danilo Sr. sa Cebu City Medical Center si Casinillo apan pagka-alas 4:30 sa kaadlawon nakabsan kini sa kinabuhi samtang nadakpan ang suspek human sa hitabo nila ni PO3 Geoffrey Borinaga sa Mobile Patrol Group.