Dagha'g patik gipiti sa vigilante

Napalgang naligo sa kaugalingong dugo ug may daghang samad pinusilan sa ulo ang usa ka wala hiilhing lalaki nga nabulit sa patik ang kalawasan human gipusil patay sa gituohang mga sakop sa vigilante.

Ang mga lumolupyo sa sitio Aroma, Subangdaku nga maoy nakamatikod sa mga buto sa armas ang mitaho sa kapolisan sa Presinto 2 sa Subangdaku Police Station sa dakbayan sa Mandaue ala 1:30 ang takna kagahapon sa kaadlawon.

Si PO3 Manolito Labus nga gikahinabi sa Banat News miingon nga ang biktima gibanabanang 26 ngadto sa 30 anyos ang panuigon ug kasarangan lamang ang gitas-on ug panglawas.

Matud pa niya nga si SPO1 Emmanuel Enople ug mga sakop sa Scene on Crime Operation (SOCO) sa kapolisan maoy mihimo og pakisusi sa patay'ng lawas sa biktima.

Dunay patik nga BC 45 kun 'Batang Cebu 45' nga sagad makita sa mga tawong nabilanggo na sa Bagong Buhay Rehabilitation Center, usa usab sa timailhang posibleng vigilante ang mitumba sa biktima.

Ang lumolupyo sa maong dapit nakabati sa daghang buto sa armas dihang ila kining gisusi ilang naabtan ang usa ka Mazda nga kolor puti nga gituohang maoy gisakyan sa mga mamumuno.

Si Enople miingon nga pipila ka lumolupyo sa maong dapit nga mitug-an kanila nga sunod-sunod ang nabati nilang buto sa armas ug dihang ilang gisusi nakita na lamang nila ang patay'ng lawas nga nahagba sa daplin sa karsada.

Sa pagpakighinabi sa Banat News kang PO2 Jimmy Fortes sa SOCO maoy iyang gipadayag nga pulos gyod sa ulo ang igo sa biktima ug walay igo ang lawas niini.

Sumala pa niya nga walo ka kabhang sa kalibre .9 mm nga bala ang napalgan sa crime scene apan dili pa gyod nila matino kun mao ba usab ang igo sa ulo sanglit himuon pa man ang autopsy niini.

Ang patay'ng lawas sa biktima anaa karon gihaya sa Rolling Hills sa dalan A.S. Fortuna sa Banilad sa maong siyudad ug nagpaabot sa moila nga mga kabanay niini.