Mga parking lot padestinohan og guwardiya

Ang kadagkuan sa City Hall nagtinguha karon nga ang mga tagdumala og private parking areas sa lainlaing dapit dinhi sa dakbayan mobutang gayod og mga guwardya sa ilang parking lot aron makabantay sa mga sakyanan nga mo-parking sa ilang lugar.

Si Konsehal Raul "Yayoy" Alcoseba miduso og ordinansahon tungod kay naobserbahan niya nga midaghan karon ang mga parking area nga gidumala og mga pribadong indibidwal ingon man mga korporasyon nga gitumong isip negosyo.

Nabantayan ni Alcoseba nga sagad niining maong mga pribadong parking areas walay mga gwardya ug hinungdan nga daghan sa mga sakyanan nga mo-parking ang makawatan og mga butang.

Gisugyot ni Alcoseba nga himoon usab nga uniporme ang bayad ngadto sa mga tag-iya sa sakyanan nga moparking niining mga private parking areas.

Si Alcoseba misugyot nga kinahanglang ang bayranan sa parking P20 lang sa unang tulo ka oras ug tag singko pesos ang dugang mga oras kun ang parking area sementado ug kaha aspaltado.

Apan matud ni Alcoseba nga kun ang parking area dili sementado ug dili usab aspaltado, kinahanglang kubos kay sa aspaltado o sementado nga parkingan.

Gipaabot hinuon nga makasugat og pagsaway ang gisugyot nga ordinansahon ni Alcoseba tungod kay ang mga daplin sa karsada dinhi sa dakbayan nga gihimong parking areas, tag P15 man gani ang bayad sa matag takna.

Nagpasabot kini nga sa tulo ka oras nga parking diha sa daplin sa karsada, ang tag-iya sa sakyanan makabayad og P45 samtang kun ang ordinansahon maaprobahan, ang mga tag-iya sa private parking areas mokita lang og P20 sa unang tulo ka oras nga pagparking.

Ang laing sugyot ni Alcoseba mao nga ang matag private parking lots kinahanglang dunay mga pansayan nga alang sa mga babaye ug lalaki nga magamit sa ilang kliyente.

Kining maong gisugyot nga ordinansahon gisumiter na sa mga sakop sa committee on laws aron tun-an kun angay ba nga isukip sa traffic code dinhi sa dakbayan sa Sugbo.