Fishing operators ipatawag

Human mapatawag ang manag-amahang sila si Pablito Santos ug anak niining si Tony, duna pay laing mga personalidad nga nanag-iya sa komersyal nga panagatan ang giimbitahan diha sa buhatan sa Criminal Investigation and Detection Group 7 kabahin sa kamatayon ni Cebu City Market Administrator ug mao usab ang chairman sa Bantay Dagat Commission.

Ang mga Santos kinsa mga negosyante sa Talisay mitungha sa CIDG7 niadtong Sabado aron limpyuhan ang ilang pangalan sa kamatayon ni dela Victoria.

Si dela Victoria ang responsable sa mga pagpasira sa mga bodega sa ammonium nitrates nga gipanag-iya sa mga Santos ug ingon man ang bodegang FDR Garcia nga gipanag-iya sa umagad ni Pablito.

Matud pa ni dela Victoria niadtong buhi pa kini diha maggikan sa Talisay ang mga suplay sa blasting caps ug mga pulborang gamiton paghimo og mga dinamita.

Hinuon si CIDG7 chief, Jorge Corpuz nagkanayon nga wala ikunsiderar sa pagkakaron nga suspek ang manag-amahan.

Samtang giangkon sa CIDG7 nga ila pang gipaabot nga motumaw diha sa ilang buhatan ang mga operator sa commercial fishing vessels nga nagbase sa amihanang bahin sa lalawigan diin maoy naapektahan sa pagpasira sa Visayan Sea Squadron nila ni dela Victoria ug Atty. Antonio Oposa.

Daan nang mibutyag si dela Victoria ug Oposa nga duna sila'y impormasyong nadawat nga dunay grupo sa mga commercial fishing operators ang nagtampo-tampo aron ibayad sa mopatay nilang duha, giingong tagsa ka milyon ang patong matag usa kanila.

Samtang mitumaw sa gihimong drug test sa suspek nga si SPO1 Marcial Ocampo nga negatibo kini sa paggamit og shabu. Kahinumduman nga gipasanginlan si Ocampo sa mga opisyal sa Regional Investigation and Intelligence Division nga usa ka drug user ug drug pusher.