Mangaoang wala mabalhin

Magpabilin si Cebu Customs Collector Atty. Lourdes Mangaoang sa katungdanan human opisyal nga gisuspenso ang Customs Personnel Order 169-2006 nga giluwatan ni Acting Customs Commissioner Napoleon Morales.

Atol sa press conference kagahapon, gipahibawo ni Mangaoang nga dili siya mobiya sa pwesto hangtud dili siya makadawat sa opisyal ug orihinal nga kopya sa order nga pirmado ni Finance Secretary Margarito Teves.

Matud pa ni Mangaoang nga kon ipatuman gyud ang CPO, bukas siya sa tanang mapilian nga lakang sa pagkwestiyon sa kamandoan sa pagpabalhin kaniya gikan sa Sugbo.

Apan human sa pipila ka minutos sa press conference, si Mangaoang nakadawat og tawag sa telepono gikan sa officer-in-charge sa uluhang buhatan sa Bureau of Customs nga si Alexander Arevalo nga nagpahibawo nga gisuspenso ang CPO 169-2006.

Ang maong CPO gitumong sa paglahugay sa mga opisyal sa mga customs collector diin lakip na ang pagpabalhin kang Mangaoang ngadto sa Iloilo ug ipuli kaniya si Grace Caringal gikan sa Subic.

Gikatakda unta nga molingkod sa katungdanan kagahapon si Caringal apan wala kini nadayun.

Nagdumili hinoon si Mangaoang pagkomentaryo kon unsay mahitabo sa BOC sa Sugbo kon niabot pa si Caringal.

Nasurpresa si Mangaoang sa CPO sanglit sagad gihimo sa ilang buhatan mao ang konsultasyon kon dunay ibalhin nga opisyal ug ang paghatag og higayun kanila sa paghuman sa gimbuhaton sa ilang buhatan una pa ibalhin sa laing lugar.

Ang mga kawani sa BOC sa Sugbo kagahapon pulos nagsul-ob og itom nga senina isip protesta sa pagpabalhin kang Mangaoang.

Sa iyang bahin ang abogado ni Mangaoang nga si Atty. Oliveros Kintanar nagkanayun nga ang CPO kalapasan kini sa Administrative Order 133 ni Presidenti Gloria Macapagal Arroyo nga nagmando nga ang Finance Secretary mao lang ang may gahum sa pagbalhin sa mga presidential appointees sa Bureau of Customs.