Mitulis, mipatay sa polis ikiha

Si Supt. Audie Villacin hepe sa kapolisan sa Talisay mibutyag kagahapon nga mag-atubang og kasong robbery with homicide ang suspetsado sa pagpusil patay ni SPO2 Teofanes Castro niadtong Huwebes sa gabii diha sa Laray San Roque, Talisay.

Niadtong Domingo sa gabii nasignit sa kapolisan sa Talisay si John Iris Daan kinsa gipasanginlang usa sa may kalabutan sa kamatayon ni Castro.

Matud ni Villacin nga si Daan usa sa gitumbok sa mga nakasaksi sa pagpatay ni Castro ug giandam na nila ang kaso nga robbery with homicide nga ilang ipasaka batok sa suspetsado.

Gitataw ni Villacin nga tulis ang motibo sa mga suspetsado ug atol sa maong hitabo adunay duha ka kuyog si Castro nga maoy ilang gihimong saksi sa krimen.

Niadtong Lunes sa gabii napalgan sa mga opisyal sa nahisgutang barangay ang driver's license, PNP pay slips, AFPSLAI ID, Philhealth ID, sedula ug uban pang personal nga dokumento ni Castro diha sa katunggan sa maong lugar.

Si Villacin nagkanayon nga ang mga suspetsado nangukay pa sa sakyanan ni Castro una kini mibiya apan wala nila makuha ang relo de pulso ug singsing ni Castro tungod kay naub-an kini sa maong polis dihang nahagba kini sa karsada human sa pagpusil.

Gibutyag ni Villacin nga ang grupo ni Daan adunay payag-payag diha sa lugar nga estambayanan ug anha sila maglantaw sa karsada kun anaa silay gustong biktimahon.

Si Villacin mibutyag usab nga ang cellphone ni Castro nahibaw-an nilang gibaligya na ug ang nakapalit taga dinhi sa dakbayan sa Sugbo.

Si Villacin midungag nga si Daan adunay laing mga kauban ug padayon pa nila karong gipangitaa.

Si Daan mihimakak sa nahisgutang mga pasangil sa pakighinabi niini kagahapon sa Banat News.

Matud ni Daan nga si Ismael Secretaria alyas "Jun Jun Kimpang" ang mipusil ni Castro.

Gibutyag ni Daan nga si Secretaria kanhi asset sa mga polis ug siya maoy gitumbok niini nga mipatay ni Castro dihang gisignit kini sa mga polis niadtong Sabado ug human niini og tudlo kaniya miikyas na kini.

Si Daan mipasalig nga andam siyang motestigos pagmatuod nga si Secretaria maoy mipusil ni Castro tungod kay diha siya sa pagkahitabo sa maong insidente apan nahadlok lang siyang mosumbong sa kapolisan tungod kay basin siya ang isunod og patay ni Secretaria.

Giawhag usab ni Daan si Secretaria nga mopakita na sa mga polis aron atubangon ang mga pasangil.