Pangabuhian sa Talisaynon

Kanhi station manager sa DYMF Bombo Radyo Ike Durano pormal na nga mipahigayon sa iyang trabaho isip Executive Assistance sa Livelihood Project ni Mayor Socrates Fernandez sa Talisay.

Kahinumdoman nga si Durano miluwat sa iyang katungdanan gikan sa Bombo Radyo sa milabay'ng semana diin matud pa niini nga dunay laing tawag kaniya sa serbisyo para sa katawhan.

Gibutyag ni Durano kagahapon sa Banat News nga una niyang gisentro karon nga itudlo sa mga Talisaynon para makatabang sa panginabuhian ang rags production kun paggama og trapo.

Matud ni Durano nga ang Barangay Tangke maoy ilang prayoridad diin adto sila una mopahigayon og training sa livelihood program sa rags production.

Gitataw ni Durano nga ang tanang pinaka-kabus nga Talisaynon maoy makapahimos sa maong programa diin mao kini ang mando ni Fernandez kaniya.

Ang kagamhanan sa siyudad maoy moabaga sa galastohan sa proyekto apan pahinay-hinayan og pabayad sa mga miyembro sa livelihood.

Si Durano nagkanayon nga mibuhat na siya og komunikasyon kagahapon sa Metroware usa ka pabrika sa Mactan Export Processing Zone (MEPZ) para ang dakbayan maoy mopalit sa mga ritaso nilang panapton para himuong materyales sa trapo.

Si Durano midungag nga gawas sa rags production, piggery, poultry ug paggama og mga materyal sa konstraksyon itudlo usab nila kung unsaon pagbaligya ang ilang mga produkto.