9-anyos gituok human lugosa

Usa ka 9 anyos nga batang babaye gituohang gilugos, gituok una pa gitambog sa dagat ug napalgang patay kagahapon sa buntag diha sa baybayon sa Sitio Tiwasan, barangay Catarman lungsod sa Liloan.

Giila sa kapolisan ang biktimang si Jennelyn Soreño, molupyo sa nahisgutang dapit kinsa ulahing nakit-ang nagtan-aw pa og telebisyon diha sa silingan sa milabay'ng gabii.

Sumala pa sa amaama sa biktima nga si Danilo (apelyedo wala pa makuha sa kapolisan), usa ka fiber glass cutter, nga wala na mabalik ang iyang anak human kini motan-aw og telebisyon sa silingan. Gani sa dihang miabot ang iyang asawa nga si Jovy ilang gipangita ang bata hangtud kaadlawon apan pakyas ang ilang tinguha.

Kagahapon sa buntag nakit-an na lang sa mga molupyo sa nahisgutang lugar ang nagkaob nga patay'ng lawas ni Jennelyn diha sa baybayon nga naglunang sa dugo nga misagol sa tubig sa dagat diha sa hunasan sa nahisgutang barangay.

Dako ang pagtuo ni Inspector Milo Dagasdas, hepe sa Liloan Police Station, nga gilugos ang bata ug posibleng gituok hangtud nga namatay una pa gilabog sa dagat apan wala maanod sa layo gumikan kay dunay mga koral-koral ang dagat.

Gikatahong dunay dugo nga nanggawas diha sa bilahan sa bata ug sa baba niini dihang nakaplagan sa mga residente duol sa baybayon kinsa daling mipahibalo sa kapolisan.

Matud pa ni Dagasdas nga mao pa kini ang labing unang higayon nga may susamang insidente nga nahitabo diha sa iyang hurisdiksyon apan mipasalig nga mataral gyud sa hukmanan ang mga responsable niini.

Ang National Bureau of Investigation 7 medico legal officer nga si Dr. Gil Macato maoy mipahigayon og awtopsiya ngadto sa patay'ng lawas sa biktima aron matino kun giunsa pagpatay ang biktima ug aron matino kun gilugos kini.

Ang kapolisan sa Liloan miimbitar na og tulo ka tawo diha sa ilang buhatan alang sa pagsukit-sukit lakip na ang amaama niini kinsa gikatahong maoy nagbantay sa biktima nianang adlaw nga nawala ang bata.

Si PO3 Marcelino Servillo sa pakighinabi sa Banat News nagkanayon nga duna nay duha ka grupong gitukod si Dagasdas aron maoy mopalawom sa imbestigasyon sa kaso, lakip na ang pagsukit-sukit sa mga tawong ulahing gikauban sa bata nianang milabay'ng adlaw.