ROTC Convention bangkahan ni Mayor Tom og panihapon

Bangkahan og panihapon sa kagamhanan sa siyudad sa Sugbo ang convention kon labing unang panagtigum sa 1st National Philippine Army ROTC Corps Commander nga ipahigayon diha sa Ecotech Center sa Lahug karung petsa 1 sa bulan sa Marso.

Kini human personal nga nakigtagbo ngadto kang mayor Tomas Osmeña ang Group commander sa 7th Regional Community Defense Group Army Reserve Command sa Camp Lapu-Lapu nga si Col. Guillermo Luyao kagahapong adlawa.

Hinoon P30 mil lang ang gi-aprobahang gahin ni Osmeña alang sa maong panihapon sa dili momenos 200 ka mga group commander gikan sa lain laing lugar dinhi sa nasud apil na ang 30 ka mga guest niini.

Gipasabot ni Osmeña makatabang og dako ang grupo sa reserve command sa ilang pagamit unya sa siyudad sa mga ROTC sa umaabot unya nga pag-host sa siyudad sa 12th Asean Summit.

Giplanuhan sa mayor nga makatabang ang maong grupo sa pag-establisar og mga network sa mga kasikbit nga kalungsoran ug dakbayan dinhi sa Sugbo nga motabang unya sa pagpatunhay sa kahusay og kalinaw atol sa maong Summit.

Nasayran nga si Osmeña maoy nangusog sa pag-discourage og pagputol sa mga himoong pagbangka sa syudad og panihapon ilabina sa mga pasiugdahan nga okasyon sa dakbayan gumikan kay nag-usik usik lang kini sa gasto og pipila lang ang makabinipisyo niini.

Gani giputol sa mayor ang naandan na nga pag-host sa syudad og panihapon ngadto sa mga bisita matag charter day celebration sa dakbayan karong petsa 24 sa bulan sa Pebrero.