Libreng painit sa Misa de Gallo

Libreng painit manimba sa Misa de Gallo Halad Ni Bise Mayor Chiong.

Nahimo nang panaad ug gidumdom ni Bise Mayor Valdemar M. Chiong, sa Naga, Cebu, paghatag og libreng painit nga puto ug sikwati ngadto sa mga manimba sa unang Misa de Gallo kun simba sa kaadlawon matag tuig.

Kining mao niyang kalihokan gihimo niya gikan pa sa pagka pili niyang konsehal hangtod sa iyang pagka bise mayor sa maong lungsod. Iya gayod kining pagdumdom sa unang misa sa kaadlawon panahon sa kasaulogan sa Pasko sa pagkatawo sa atong Manunubos.

Siya giabagan usab sa mga sakop sa Catholic Women's League (CWL), diin ang iyang inahan si Dr. Eugenia M. Chiong, retiradong Division Superintendent of Schools sa Lapu-Lapu City ug Tagbilaran City, nga mao usab ang presidente sa CWL.

Ang mga sakop niini mao ang gitahasan ni Chiong sa pag-apod-apod sa mga pinutos na sa plastic bag nga sikwati ug puto sa mga nanimba paggula niini gikan sa simbahan. Ang grupo anha magpahimutang sa mga pultahan sa simbahan.

Sumala pa ni Vice Mayor Chiong, kining mao niyang kalihokan nahimo na niyang panaaran panahon sa Pasko sa pagka tawo sa atong Ginoo. Pagtunol sa gamay niyang gasa ngadto sa mga mosimba sa Misa de Gallo kun misa sa kaadlawon.