Ginang, 86, nasugba

Usa ka 86 anyos nga masakitong ginang nasugba samtang natulog dihang nasunog ang lantay nga iyang gikatulgan diha sa kusina duol sa dapit lutoanan kagahapon sa kaadlawon.

Wala na matabang sa mga kabanay ang biktimang si Emiliana Limbaga Dadan, nagpuyo diha sa iyang mga anak nga nangabang sa balay ni Alfredo Bihag sa Purok 6 Upper Cobacob dakbayan sa Mandaue.

Si SFO1 Roy Garcia sa pakighinabi sa mga tigbalita mitug-an nga wala na nila maabting nagdilaab ang kusina sa mga biktima sanglit ang kantre rang gikatulgan ni Dadan maoy nasunog ug dali usab nga napawong sa mga anak niini, giingong ang mga nangaging habal-habal drayber maoy nakakita sa pagdilaab ug maoy namukaw nila ni Bernardita Dadan.

Matud pa sa mga anak ngadto kang SFO1 Garcia ilang gibutang ang ilang inahan sa kusina gumikan kay malisod kaayo para sa ilang inahan ang maglakaw ilabi na kun maghugaw kini maong diha kini gibutang sa may kusina duol sa pugo.

Si Mandaue City Fire Marshal Oscar Mayol sa pakighinabi sa Banat News mibutyag nga naglibog siya kung diin gikan ang kalayo kay nangangkon man ang mga anak sa biktima nga gipawong nila ang pugon una pa sila mangatulog. Gituuhan sa mga bombero nga natagakan og aligato ang unlan sa biktima ug maoy nakaingon nga midukot kini sa tibuok katre diin matulog ang tiguwang.

Si Mayol mibutyag nga dunay lawom nga imbestigasyon nga himuon ang iyang buhatan kalabot sa insidente aron matino kun giunsa pagkahitabo ang sunog.