BOC-Cebu nangandam pagduaw sa 'martilyo gang'

Nangandam na ang mga opisyal sa Bureau of Customs sa Cebu nunot ning kampanya karon sa bag-ong komisyoner pagtukod og "martilyo gang", aron manglansang sa tanang drawer sa lamesa sa mga opisyal sa maong ahensya.

Ang usa ka trabahante sa BOC ning siyudad nagkanayon nga ang grupo sa martilyo gang magdala og martilyo ug lansang aron sirad-an ang tanang drawer sa lamesa sa mga opisyal sa ahensya aron mahunong na kining ilang pagdawat og suborno gikan sa mga smuggler.

Nasayran nga mao kini kampanya karon ni Komisyoner Alexander Arevalo kinsa nasayod nang daan nga ang mga drawer sa mga opisyal sa BOC sa nagkalainlaing lugar ilabi na sa Cebu, nga magngana kanunay pagsanggab sa iabot nga suburno gikan sa mga smugller.

Miingon si Arevalo nga moa kini iyang unahon pagsumpo pinaagi sa pagmartilyo sa maong mga drawer aron nga dili na magnganga pirme.

Iya usab nga gihangyo ang kongreso nga gahinan og dakong kantidad ang BOC kay mamalit siya og mga lamesa nga wala nay drawer alang sa tanang buhatan niini sa tibuok nasud.

Hinuon ang mga hinguwarta nga opisyal sa BOC, Cebu may pang-alkontra nang plano batok kang Arevalo.

Kini mao ang mga basurahang ibutang sa ilawom sa ilang lamesa aron adto itapok sa mga smuggler ang ilang suborno sa panahong lamesa na nga way drawer ang ipagamit sa mga opisina sa BOC.