Pasahero sa taxi gitulis sa drayber

Nakugang ang usa ka babaye dihang ang drayber sa taxi nga iyang gisakyan tulisan diay ug may kakunsabong lalaki nga kalit usab misakay dungan kaniya human siya misakay gikan sa Pier 4 ning dakbayan kagahapon sa buntag.

Midangop sa Thief and Robbery Section ang biktimang si Hazel Franswa, 29, minyo taga Saa State, Barangay 26 dakbayan sa Gingoog ug mianhi dinhi sa Sugbo aron sugaton ang iyang langyaw'ng bana nga taga Netherlands.

Gihulagway sa biktima nga ang mitulis kaniya mao ang drayber sa taxi nga gibanabanang nagpangidaron na og 40 kapin, kakunsabo niini mao ang usa ka putot nga lalaking kasarangan ang gidak-on sa lawas, brown ang pamanit, nag-bullcap ug suot ang puti nga t-shirt ug maong nga pantalon.

Sumala pa niya iyang gipara ang maong taxi aron unta magpahatod sa usa ka hotel sa downtown Cebu apan nakurat nalang siya dihang misakay kalit ang putot nga lalaki diha sa iyang tupad dayon tion og mahait nga hinagiban ug mipahibalog tulis.

Matud pa niya ang drayber wala gyuy gihimo gani nagpadagan gihapon kini sa taxi subay sa General Maxilom Extension sa Barangay Carreta ug pag-abot sa atubangan sa usa ka motel pugsanon siyang gipakanaog sa duroha.

Nakuha gikan kaniya mao ang iyang bag nga may sulod nga sinina balor og P5 mil, kuwartang P32 mil, cellphone nga 2100 nga nagkantidad og P5 mil, upat ka bulawang singsing nga nagkantidad og P24 mil.

Ang biktima daling nagpatabang sa mga tawo apan dali usab nga nakaikyas ang mga suspek.