6 nahilo sa lumpia

Unom ka mga batang tinun-an sa usa ka pribadong tunghaan sa barangay Poblacion, lungsod sa Dumanjug ang nangahilo gumikan sa pagkaon og piniritong lumpia sa ilang paniudto niadtong milabay'ng Lunes sa udto.

Ang mga biktima milandig sa Barili District Hospital human mobati og pagpanglipong, pagsakit sa tiyan ug pagsuka gikang nangaon og piniritong lumpia sa usa ka kan-anan diha duol sa ilang tunghaan sa naasoyng dapit.

Milandig sa tambalanan mao sila si Niña Camocamo, 14, taga Barangay Sima, Irene Aleo, 14, taga barangay Pakulob, Susana Mae Antiquinia,14, taga barangay Ylaya, Jewel Gimena, 14, taga Cambuang, Janet Villanueva,14, taga Cogon ug Rhea Tamilin, 14, pulos mga tinun-an sa Little Flower School.

Sigun pa ni PO2 Ferdinand Imperial sa Banat News daling gidala ang mga bata sa tambalanan ug gikuhaan dayon sa kapolisan og sampol ang gikaon sa mga bata dayon gisumiti ngadto sa municipal health sa ilang lungsod.

Giingong sa inisyal nga resulta ang hinungdan sa pagkahilo mao ang kagaw nga makuha sa hangin apan dugang eksaminasyon pa ang gihimo karon sa mga awtoridad.