Jueteng susihon sa mga kapitan

Diskution atol sa tigum sa mga sakop sa board sa Association of Barangay Council (ABC) karong Huwebes ang balita nga nakasulod na ba dinhi sa dakbayan sa Sugbo ang sugal nga jueteng.

Gibutyag ni ABC president Eugenio Faelnar nga gipaabot nga ilang sabot-sabotan uban sa mga kapitan sa lainlaing kabarangayan ang problema sa ilegal nga sugal ilabi na ning gihugonhugonan nga pagsulod na dinhi sa dakbayan sa jueteng.

Si Faelnar, sa iyang bahin, masaligon nga wala pa hingpit nga naka-operate diha sa iyang barangay sa Guadalupe ang maong sugal ug bisan na sa ubang mga barangay dinhi sa dakbayan.

Matud sa konsehal nga iyang nahibaw-an nga testing lang ang maong nahitabo nga pagka-diskubre sa maong sugal nga jueteng diha sa Sityo Kanaas, Guadalupe niadtong miaging Sabado nga gironda sa mga tinugyanan sa Criminal Intelligence and Detection Group (CIDG-7).

Gibasol sa konsehal ang mga Sugboanon nga magpatintal sa mga ilegal nga sugal ug bisan gani sa jai alai nga bisan og klaro na kaayo nga binuang ang pagkuha sa resulta niini hinungdan nga dunay daghan nga mga operator ang padayong nadasig pagpasiugda og mga kalihukan sa bisan unsang matang sa sugal.

Gibasol sab sa konsehal ang kapolisan sa Guadalupe Police Station-9 pinangulohan sa hepe niini nga si Pedrillo Villamor gumikan kay kanunay gyud unta kini niyang gipahimangnuan apan nalutsan gihapon sa maong matang sa sugal.q