2 napusilan; polis usa sa mga suspek

Usa ka polis nga gituohang sakop sa usa ka fraternity gipasanginlang miapil sa pagpamusil sa usa ka batan-ong gituohang sakop usab sa fraternity ug miangol pa sa usa ka tawo diha sa Barangay Poblacion Occidental lungsod sa Consolacion kagahapon sa kaadlawon.

Ang nangasamdan ug gidala sa tambalanan giilang sila si Ariel Solivar,23, molupyo sa Barangay Cabancalan dakbayan sa Mandaue ug vulcanizer nga si Minor Isoc,21,minyo ug molupyo sa maong barangay.



Samtang ang polis nga gitumbok sa pagpamusil giilang si SPO1 Mateo Pascual, wala pa matino kun haing police unit kini masakop apan giingong adviser sa fraternity ug duha ka kauban diin usa kanila giilang si John Perez, taga dakbayan sa Lapu-Lapu ug usa ka wala pa mailhing tawo.

Ang tulo gikatahong luwan sa usa ka motorsiklo nga naghuwat diha sa naasoy'ng lugar diin magpadugang og hangin sa iyang awto ang biktimang si Solivar.

Sigun pa ni PO3 Marcelo Cometa ang imbestigador sa maong kaso sa Banat News susama'g gituyo ang pagpahiyos sa ligid sa awto sa biktima aron kini atangan diha sa maong vulcanizing shop.

Giingong si Solivar gikan pa motan-aw og Miss Gay pageant diha sa Barangay Tugbungan ug didto pa giingong mipasidaan na si Solivar sa iyang uyab nga si Mayflor Durano kung dunay mahitabo adtong gabhiuna kaniya kining mga tawhana maoy nakaingon.

Dihang mamauli na unta ang biktima ug iyang uyab nasutang hiyos ang mga ligid sa iyang awto maong nakadesider kining padugangan ang hangin sa ligid diha sa barangay Poblacion Occidental.

Apan samtang si Solivar ug Isoc nag-apong sa ligid kalit nga miabot ang mga suspek luwan sa usa ka motorsiklo dayong kalit pamusil kanila hinungdan sa pagkaigo ni Solivar diha sa kalawasan ug pagkaigo usab ni Isoc diha sa iyang tuong bukton. Upat ka basiyo sa kalibre 9mm ug usa ka basiyo sa kalibre 45 nga bala ang nakit-an sa kapolisan diha sa crime scene.

Si PO3 Cometa nagkanayon nga susihon pa nila kung asang police unit madestino si SPO1 Pascual kinsa giingong miyembro sa usa ka fraternity.

Wala hinuon moklaro si Cometa kun unsang fraternity ang nalambigit sa maong insidente apan giingong ang uyab ni Solivar sa pagpangutana sa kapolisan mibutyag nga kontra sa fraternity sa iyang uyab ang mga suspek.