Terminal sa habal-habal mugnaon
CEBU, Philippines - Gipahibawo ni Mayor Tomas Osmeña nga giplanuhan na sa siyudad nga i-regulate ang habal-habal drivers ug kabahin niini mao ang pagbutang og habal-habal terminals.
Una niini, adunay mga reklamo nga mitumaw kay matud pa ang mga habal-habal driver muabot na sa pagpamasahero sa mga nag-unang kadalanan sa siyudad.
Sigon ni Osmeña ang pagtukod og habal-habal terminal magsilbi nga focal point sa regulation nga ila unyang ipatuman.
Nasayran nga ang pilot areas sa terminal mao ang Lahug Public Market sa Barangay Lahug diin kun hatagan og pagtugot ang siyudad ilang i-condemn ang unang andana sa public market aron himoong terminal. Butangan kini og dulhogan aron sayon na lang ang pagsaka paingon sa second ug third floor sanglit plano sa siyudad nga anha ipahimutang ang merkado nga giingong wala pa magamit hangtod karon.
Gihulagway sa mayor nga dili lang habal-habal drivers ang makabenepisyo niini apan lakip na sab ang public market.
Samtang ang laing habal-habal terminal ibutang sa Barangay Apas ug ipahiluna sa luna nga gipanag-iya sa siyudad duol sa usa ka mall diin ang first floor himoon gihapon nga terminal ug ang laing mga andana buhaton nga boarding house alang sa call center agents. Hinoon, sa pagkakaron nga wala pa masugdi ang plano, gi-organize una sa siyudad ang habal-habal drivers diin adunay gitahasan ang mayor nga motrabaho niini.
Gitinguha sab nga ihisama sa Grab o Uber ang habal-habal diin tawgon kini og “Angkos”. Matud ni Osmeña ilang suwayan ang tanan ug kun dili epektibo, mahimo ra kining wagtangon apan kun maayo ang resulta, ipadayon kini sa siyudad. (BANAT NEWS)
- Latest