‘Strongman’ ng Ukraine, kinakarga ang mga kabayo upang ipamalas ang lakas

IPINAKITA ng isang champion powerlifter mula sa Ukraine na puwede rin palang sakyan ng kabayo ang tao.

Upang maipamalas kasi ang kanyang pambihirang lakas ay nagkakarga ng kabayo ang tinaguriang Ukrainian ‘strongman’ na si Dmytro Khaladzi.

Katulad ng ibang powerlifters ay nagpapakitang gilas si Dmytro sa pamamagitan ng pagpapasagasa sa truck, pagbaon ng pako sa tabla gamit lamang ang kanyang palad , at pagbali sa bakal gamit ang kanyang panga.

Sa kabila ng lahat ng ito ay ang pagkarga ni Dmytro sa mga kabayo ang nagbigay sa kanya ng kasikatan. Naging viral kasi sa Internet ang mga video na nagpapakita kay Dmytro habang may pasan-pasan siyang kabayo sa kanyang mga balikat.

Madalas ay pumapalag ang mga kabayo   lalo na’t hindi naman sanay ang mga ito na kinakarga kaya naman tinatalian ang binti  ng mga ito upang hindi sila masyadong maglikot habang sila’y buhat-buhat ni Dmytro.

Sinasabing may hawak na 63 world records si Dmytro bilang isang powerlifter at inaasahang madadagdagan pa ito lalo na’t wala pa siyang naitatalang  world record ukol sa ginagawa niyang pagbuhat sa mga kabayo.