Wa gyu’y mitabang ni Mike

Kadaghan diay sa mga tawo nga gipangduol ni kanhi mayor Michael Rama aron siya kahatagan og higayon nga magkahinabi og si Presidente Rodrigo Duterte sa tumong nga mapasabot niya nga dili siya drug protector.

Apan sa mga gipangduol ni Rama, wala gyu’y nakatabang kaniya. Kay moanhi man sa dakbayan sa Sugbo si Duterte karong adlawa, nangandoy si Rama nga kahatagan unta siya og higayon, pero mura’g lisud siya kahatagan og higayon.

Pastilan, subli na man sab gud nga gianunsyo ni Presidente Duterte ang ngalan ni Rama nga drug protector. Ambot lang kun kinsa kaha ang naghatag sa maong report ngadto kang Duterte kay matud pa nga gikan kini sa kapolisan ug militar.

Kun ako pa ni Rama, distansya na nianang mga opisyal sa barangay nga wala magtagad sa problema sa ilegal nga drugas sa ilang dapit. Ayaw na pakig-alyado kanila kay sila apil nga nakatampo nga mapasanginlan ka nga drug protector.

Sama sa Barangay Duljo-Fatima nga diha gyud nagbase kaniadto si Jaguar, wala malilong nga kaalyado ni Rama si Kapitan Elmer Abella ug ang ubang opisyal. Mangutana ko, unsa may gihimo nila ni Abella sa problema sa drugas sa ilang barangay?

Pananglit sa Barangay Carreta, si Kapitan Eduardo Lauron suod usab ni Rama, apan wala makabadlong sa drug den nga diha ra gyud likud sa barangay hall sa Carreta. Gani mura’g si Lauron ang sunod nga pasakaan og kaso sa Philippine Drug Enforcement Agency.

Daygon gyud nako si PDEA Regional Director Yogi Felimon Ruiz kay abtik kaayo nga mihimo’g kampanya batok sa mga tigpayuhot og drugas, dili sama niadtong iyang gipulihang direktor nga pagka wala gyuy “ayo” tawon.

* * *

Nag-atubang karon og kaso si Mayor Tomas Osmeña ug ang iyang asawa nga si Konsehal Margarita Osmeña didto sa Office of the President. May kalambigitan kini sa pagbukas nila pagbalik sa Inayawan Sanitary Landfill dihang milingkod na pagbalik si Tomas pagka mayor kaniadtong miaging tuig.

Nagtuo hinoon si Konsehal Osmeña nga adunay nagsugo ni Apas Barangay Kapitan Ramil Ayuman nga pasakaan sila og kaso sa Malacañang. Giawhag pa ni Ayuman ang Malacañang nga ipasuspenso ang magtiayong Osmeña sa ilang katungdanan.

Giisip ni Margot nga “moot and academic” na ang maong kaso kay gisirad-an na man pagbalik ang Inayawan landfill base sa kamandoan sa Court of Appeals. May rason sab si Margot kay dihang gibuksan nila kini atol nga nilingkod siya isip acting mayor, gihatagan siya og pagtugot sa Environmental Management Bureau (EMB).