Warriors ipinagpag ang Raptors

OAKLAND, California--Kumamada si Kevin Durant ng 22 points, dinuplika ang kanyang season best na 17 rebounds bukod pa sa 7 assists at career high-tying na 6 blocks para banderahan ang Golden State Warriors sa 121-111 panalo laban sa Toronto Raptors.

Nagdagdag si Stephen Curry ng 28 points, 7 assists at 7 rebounds, habang may 21 markers  Klay Thompson para sa Golden State.

Nadismaya sa kanyang sarili makaraang isuko ang itinayong 14-point lead sa fourth quarter bago natalo sa Cavaliers, 108-109, sa Cleveland sa Christmas Day, ibinuhos nila ang galit sa Raptors.

Pinamunuan ni DeMar DeRozan ang Toronto sa kanyang 29 points para maging career scoring leader (10,290) ng Raptors at ungusan si Chris Bosh (10,275 points).

Sa kabila nito ay napigilan pa rin ang franchise-record na seven-game road winning streak ng Raptors.

Ipinoste ng Golden State ang 25-point lead matapos ang first quarter para talunin ang Toronto sa ika-12 sunod na pagkakataon sa kanilang tahanan.

Ang three-pointer late ni Thompson sa dulo ng third period ang nagbigay sa Warriors ng 95-75 kalamangan.

Sa Washington, nagtala si John Wall ng 36 points at 11 rebounds para akayin ang Wizards sa 111-105 panalo laban sa Indiana Pacers sa kabila ng pagkakaroon ni Bradley Beal ng sprained right ankle sa first half.

Nag-ambag si Otto Porter Jr. ng 22 points para sa Washington, habang humakot si Marcin Gortat ng 13 points at 16 rebounds.

Umiskor naman si Beal ng 12 points sa loob ng 18 minuto at hindi na natapos ang laro.

Sa iba pang resulta, tinalo ng Charlotte ang Orlando, 120-101; tinakasan ng Atlanta ang New York, 102-98; pinatumba ng Milwaukee ang Detroit, 119-94; nilusutan ng Chicago ang Brookly, 101-99; dinaig ng San Antonio ang Phoenix, 119-98; pinagbagsak ng Denver ang Minnesota, 105-103; namayani ang Portland sa Sacramento, 102-89 at hiniya ng New Orleans Pelicans ang Los Angeles Clippers, 102-98.