EDITORYAL - Dili mosipsip si Tommy

Nindot kaayo ang hukom ni Mayor Tomas Osmeña nga dili siya mangimbitar og mga dagkong opisyal sa kagamhanan, bisan pa ni Presidente Rodrigo Duterte ug Vice President Leni Robredo, aron patan-awon  sa Sinulog Grand Parade.

Matud ni Osmeña nga ang pagsiguro sa kahusay ug kalinaw sa mao nga mabulokong kalihukan maoy hatagan niya og unang pagtagad. Husto si Osmeña tungod kay ang pagtambong sa presidente sa maong kalihukan, makahatag lang og sakripisyo sa manan-aw.

Sigurado man gyud nga higpitan pag-ayo sa mga guwardiya ni Presidente Duterte ang pagpasulod sa mga tawo diha sa Cebu City Sports Center kun moanha man ang presidente. Bisan gani ang ballpen, tinidor dili na itugot nga madala sa mga tawo.

Ang pagtambong sa presidente sa Sinulog Grand Parade kun imbitahon kini sa maong kalihukan, unya moestar lang ang presidente og mga usa ra ka oras, dili gyud bugti sa dakong kahasol nga iyang mahimo ngadto sa mga tawo nga mosulod sa sports center.

Sa nangaging Sinulog Grand Parade nga giimbitar sa pagpatambong diha sa Cebu City Sports Center si kanhi Presidente Aquino ug bisan na si kanhi Presidente Arroyo, nahasol pag-ayo ang daghang mga tawo.

Higpit kaayo ang mga guwardiya. Ang mga bag nga gidala sa mga misulod giutingkay pag-ayo ug ang mga tinidor nga gamiton unta sa pagkaon, gipabilin. Mga ballpen, gipabilin bisan og ang maong mga tawo adto ra man unta magpahimutang sa grandstand nga layo ra kaayo sa presidente.

Resulta, imbes kalipay ang mahatag sa pagtambong sa presidente, bagutbot na hinoon sa mga tawo ang naani sa pag-anhi sa presidente. Angay’ng daygon si Osmeña kay wala gayud siya’y pagsipsip ngadto sa presidente.

Hinoon, kun motuyo gyud pag-anhi sa Sugbo ang presidente ug moanha sa Cebu City Sports Center nga dili na kinahanglang imbitahon, sigurado nga siya abi-abihon man gyud sa mga opisyal isip maoy amahan sa nasud.