Screen ipagamit batok langaw sa Asturias

CEBU, Philippines - Nisugyot ang pangulo sa Provincial Health Office, Dr. Rene Catan, sa mga residente sa Lungsod sa Asturias sa pagbutang una og screen sa ilang panimalay aron dili makasulod ang langaw. Matud ni Catan nga nagpadala na sila og misting team sa lugar aron pagsanta sa langaw nga gireklamo sa mga residente. 

Gihulagway nga abnormal ang gidaghanon sa langaw diin tulo ka barangay ang apektado.

Matud ni Catan nga sunod semana adunay tigum nga himoon ang PHO uban ang mga nireklamo, mga tag-iya sa poultry, lakip na ang Provincial Environment and Natural Resources office.

Si Gobernador Hilario Davide III nimando sa hepe sa PENRO, Baltazar Tribunalo, sa pagpahigayon og imbestigasyon kabahin sa problema.

Matud ni Davide nga angayan unta nga ang lokal nga kagamhanan sa lungsod ang mohatag og pagtagad sa maong problema ilabi na nga sila maoy nihatag og permit sa mga poultry.

Ang mga opisyal sa lungsod posibleng ipatawag sa Kapitolyo apan matud ni Davide nga maghuwat una siya sa isumiter nga report ni Tribunalo.

Si Bokal Christopher Baricuatro, chairman sa committee on health sa hunta probinsiyal, nangayo usab og report gikan sa PHO ilabi na nga nahitabo na ang maong problema sa niaging tuig.

Si Dr. Niño Ismael Pastor, hepe sa public health sa PHO, nibutyag nga nagpadala na sila og mga tawo nga nag-imbestigar sa problema. Le Phyllis F.  Antojado ug Brenda D. Batuto (BANAT NEWS)