Pagpili ng lider ipaubaya sa mga taga barangay - Ping
MANILA, Philippines - Hindi pabor si Senator Panfilo Lacson na hindi mga taga-barangay mismo ang pipili sa kanilang lider.
Ayon kay Lacson, kaya tinawag na barangay election ang halalan sa pinaka-maliit na political unit ng gobyerno ay dahil mismong mga nakatira sa barangay ang pipili sa kanilang lider.
Naniniwala si Lacson na hindi dapat ang Pangulo ng bansa ang magtatalaga ng mga lider sa mahigit 42,000 barangay sa buong bansa at dapat dumaan ito sa proseso ng demokrasya.
Masyado aniyang unilateral kung isang tao lamang ang magtatalaga ng mga lider ng barangay at mahalaga pa rin ang demokrasya.
Ayon pa kay Lacson, posibleng hindi niya suportahan ang panukalang muling ipagpaliban ang halalan dahil ilang beses na itong ipinagpaliban.
Dapat din aniyang magpasa ng batas kung talagang igigiit na magtalaga na lamang ng mga opisyal sa mga barangay.
Nauna nang inihayag ng Pangulo sa unang general assembly ng League of Municipalities of the Philippines na ayaw muna niyang magkaroon ng barangay election dahil sa posibilidad na maimpluwensiyahan ito ng drug money.
Samantala, naghain na si Surigao del Norte Rep. Robert Ace Barbers ng panukalang batas para sa muling pagpapaliban ng barangay at SK elections. Sa House Bill 5359, sinabi ni Barbers na mas tamang idaos ang barangay at SK elections sa 2020.
- Latest
