Ayaw pagpakasayop pagpili

Bisan og wala pa gyud masumpo sa hingpit ni Presidente Aquino ang problema sa graft and corruption sa kagamhanan sulod sa milabay’ng lima ka tuig sa iyang pangatungdanan, klaro kaayo nga sensiro ang presidente sa kampanya.

Tan-aw nako, kinahanglan gyud nga ipadayon ang mao nga kampanya ug ang tawo nga tugyanan nato sa pagdumala sa nasud human ni Presidente Aquino, kinahanglan nga sensiro ug takus nga mopadayon sa iyang kawsa.

Makatugot ba kamo nga ang palingkuron nato sa Malacañang mao ang tawo nga nabulit sa mga pasangil nga nangilkil sa kuwarta gikan sa buhis sa katawhan? Dili tingali kamo makatugot nga ngitngit ang atong kaugmaon.

Kinahanglan gyud lagi unta nga ang mga tawo nga ipangtudlo sa presidente sa mahinungdanong puwesto sa kagamhanan mao kadtong mga tawo nga dili kurakot ug wala'y tinguha nga mangawkaw.

Si Presidente Aquino miawhag sa katawhan nga kinahanglan unta nga siguradohon nga mapadayon ang iyang nasugdan nga kampanya paggukod sa mga kurakot nga opisyal ug kawani sa kagamhanan.

Mura'g klaro na kaayo nga ang gipasabot ni PNoy mao nga suportahan ang iyang ituboy nga kandidato pagkapresidente alang sa eleksyon karong sunod tuig. Klaro man gyud kaayo nga ang iyang gipasabot mao na gyud si DILG Secretary Mar Roxas.

Nakautang gyud og dakong kabubut-on si Presidente Aquino kang Roxas diha nga misibog kini sa iyang tinguha nga magpresidente unta kaniadtong 2010. Tungod sa pag-ila niya nga higala ni PNoy, midailos na lang si Roxas ug midagan pagkabise presidente.

Gipildi si Roxas kay nadani man ang katawhan sa gipasiatab ni Bise Presidente Jejomar Binay nga ang paglambo sa Makati City, himuon usab ni Binay sa tibuok na gyud nga nasud. Kinsa may dili makagusto niana?

Apan tungod sa nabutyag nga daghang kahiwian nga nahimo atol sa administrasyon ni Binay pagkamayor sa Makati City nga naglambigit sa giingon nga overpriced nga pagpatukod sa Makati City Parking Building, Makati City Science High School building ug ang giingong kuwestyonable nga pag-angkon ni Binay og hacienda sa Rosario, Cavite, nagduha-duha na ang katawhan sa pagsuporta ni Binay.

Sa gipahigayon nga survey sa duha ka ilado nga radio stations dinhi sa Sugbo sa miaging semana, "wala manemaho" si Binay. Sa mao nga survey, ang nanghawod mao sila si Mar Roxas ug Davao City Mayor Rodrigo Duterte.

Ang ako lang awhag nga kitang mga botante dili gayud magpakasayop sa pagpili sa atong presidente, bise presidente ug sa mga opisyal sa atong lokal nga kagamhanan.

***

Hangtud karon, ang mga sakop sa Land Transportation Office-7 nga gipangulohan ni Regional Director Arnel Tancinco wala pa gayud mohimo'g kampanya pagpanakop sa mga motorista kang kansang motorsiklo saba kaayo og tambutso.

Tuyoon gyud sa ubang mga tag-iya og motorsiklo nga ang ilang orihinal nga tambutso ilisan nila nianang saba kaayo nga tambutso. Ang ubang sakop sa LTO maayo lang sa uniporme apan wala gyu'y gihimong pagpanakop.

Mag-unsa man kon ang mga LTO enforcers bag-o og service vehicles apan wala'y gihimo batok sa mga abusado ug badlongong mga drayber?

***

Unta ang bag-ong CITOM executive director nga si Rey Gealon moestrikto na gyud unta sa pagpatuman sa mga lagda sa trapiko. Angay nga ipataktak niya kining mga traffic enforcers nga mura lang og kandila nga magbarug ug walay gihimo.

Angayng estriktuhon ang mga traffic enforcers kay kon dili sila manakop sa mga badlongon ug supakero sa balaod nga mga drayber, nganong papadayunon man nato sila pagpatrabaho isip traffic enforcers?

Kaniadtong Domingo sa buntag, aduna'y traffic enforcer nga nagsige lang og pakig-istorya sa polis diha sa eskena P. Del Rosario ug Pelaez Streets ug wala magtan-aw sa mga drayber nga nagpaugat nga nakabalda sa ubang sakyanan nga mangagi.

Husto ba gud na?