Maymay mapasigarbohon

CEBU, Philippines - Gikalipay sa Pinoy Big Brother Lucky 7 Big Winner nga si Maymay Entrata ang pagkompara kaniya ngadto sa komedyanteng si Melai  ug Pokwang. Sigun pa ni Maymay nga usa ka dakong dungog alang kaniya ang ikompara ngadto sa mga sikat nga komedyante sa nasud. Apan bisan pa man sa nadawat nga pagdayeg, kusganong gibutyag sa big winner nga mohimo gyud siya og kaugalingon nga ngalan sa industriya ug dili lang mosunod-sunod sa uban.

Kaslon karong tuiga

Gibutyag sa Kapamilya actress ug Its Showtime host nga si Anne Curtis nga karong tuiga na sila magpakasal sa fiancé nga si Erwan Heussaff. Dugang pa sa aktres nga lakip sa iyang entourage sa iyang kasal mao ang kaubang hosts niya  noontime show  It’s Showtime. Wala pa hinuon nibutyag ang aktres sa petsa sa kasal nila ni Erwan.

Andam magpakita sa lawas

Giasoy sa Kapuso actor nga si Lharby Policarpio nga andam siya mopakita sa iyahang lawas  sa seryeng Pinulot Ka Lang Sa Lupa kun kinahanglan gyud nga buhaton sa serye. Giangkon sab sa aktor nga andam sab siya nga modawat kun adunay motanyag niya og underwear endorsement kay matud pa dili siya buot nga mag-usik og kahigayonan nga moabot sa iyahang kinabuhi.

Celebrities nagkatapok

Nagkatapok ang ABS-CBN, GMA-7 ug TV5 stars atol sa premiere night sa horror movie nga  Pwera Usog ubos sa direksyon ni Jason Paul Laxamana. Nilugwa niadtong gabhiuna ang casts sa maong pelikula nga silang Joseph Marco, Sofia Andres, Kiko Estrada, Devon Seron, ug Cherise Castro. Nipakita sab og suporta sa maong pelikula ang aktres nga si Rita Gaviola ug aktor nga si Mark Neumann. Gipagawas sa sinehan ang maong pelikula sugod kagahapon.

Buot makabaton og medalya

Pangandoy sa hunk actor nga si Jake Cuenca nga makabaton og dungog dili alang sa iyahang pagka-aktor kun dili alang sa iyahang pag-apil og mga triathlon. Giasoy sa 29-anyos nga aktor nga ang iyahang papel sa upcoming teleserye nga “Ikaw Lang ang Iibigin”  dili na trabaho alang kaniya kun dili parte na sa iyahang lifestyle. Kasamtangan nga nangandam ang aktor sa Century Ironman 70.3 sa Subic ug Ironman 70.3 dinhi sa Cebu.

Dili pressured

Gibutyag sa Kapamilya hunk actor nga si Piolo Pascual nga wala siya nagdali nga magminyo bisan pa man sa iyahang edad karon. Sigun pa sa aktor nga dili siya buot nga mag-una-una ug magdali kay malipayon pa siya sa iyahang kinabuhi karon isip single."It's not for me to say. When it happens, it'll happen at the right time," tsika pa sa aktor.

Inspirasyon si Bea

Giisip nga inspirasyon sa Kapamilya hunk actor nga si Gerald Anderson ang uyab nga si Bea Alonzo sa pag-apil niini sa Skechers Performance Los Angeles marathon didto sa Estados Unidos. Giangkon sa aktor nga dili makatungha si Bea atol sa kompetisyon apan wala kini magkuwang pagpakita og suporta ngadto kaniya.

Pangandoy si Pia

Nangandoy ang Comedy Queen nga si Ai-Ai Delas nga makatrabaho sa usa ka proyekto si Miss Universe 2015 nga si Pia Wurtzbach. Kini human nahimamat sa komedyante ang beauty queen pinaagi sa usa ka event. Matud pa nga nakita sa komedyante nga buotan gyud kaayo si Pia ug matinud-an sa kaugalingon busa buot niya kining makatrabaho puhon.

Bag-ong gikalingawan

Malipayon nga gipahibalo sa aktres nga si Arci Muñoz nga nagbansay siya karon isip tattoo artist diin giisip niya nga usa sa iyang mga hilig. Unang gisuwayan sa aktres sa bag-ong trabaho niini mao ang iyang higala diin gi-upload niya sa Instagram ang “finished product” sa iyang tattoo session. Kahinumduman nga nisuway sab ang aktres og race car driving.

Wala nagdahom

Giangkon sa aktres nga si Gladys Reyes nga wala niya damha nga magpabilin siyang board member sa Movie and Television Review and Classification Board (MTRCB). Kini bisan pa nga bag-o na ang administrasyon niini nga gipangulohan ni Rachel Arenas isip bag-ong chairperson sa MTRCB. Unom ka tuig nga nagtrabaho si Gladys isip MTRCB board member busa wala niya balibari ang tanyag nga magpabilin nga moserbisyo sa ahensya.

Charice nangandam na

Nangandan na ang International singing sensation nga si Charice Pempengco alang sa upcoming concert niini karong Marso 24 didto sa KIA Theater. Saulogon sa singer ang ika-10 nga anibersaryo sa showbiz pinaagi sa paghigayon og usa ka concert nga giulohang “Charice X,” diin kantahon niya ang mga kanta sa  kaugalingong album nga “Catharsis.” (BANAT NEWS)