Pamaagi sa paghilam-os

CEBU, Philippines — Ang paghilam-os mao ang usa sa labing sayon nga pamaagi nga buhaton sa usa ka tawo apan dili gyud nato ikalimod nga duna gyu’y sakto nga pamaagi niini.

Dili usab angay irason nga nakalimtan kini gumikan kay ang limpyado nga tawo, modumdum gyud sa pagpanglimyo sa iyang nawong.

Matawag nato nga ang nawong ang simple nga basehan sa pagtawag sa ubang tawo kon maanyag (babaye) ta o ambungan (lalaki). Mao nga kinahanglan gyud nato ampingan ang atong nawong aron dili kita mag-ukon-ukon sa pagpakig-atubang sa mga tawo. Dugang sab, mas maayo nga modumdum kita aron makalikay sa bugas, acne, blackheads, o uban pang matang sa sakit sa panit sa nawong.

Kining mga matala sa ubos nga gikan pa sa www.self.com, mao  ang angayan na usab nga buhaton aron pabilin nga baby face ang atong nawong.

• Modumdum sa pagpanghilam-os matag gabii aron mawala ang mga abug, kamantikaon sa nawong o uban pang matang sa polusyon.

• Manghilam-os inig dayon pagmata sa buntag aron mawala sab ang mga hugaw nga nipilit gikan sa imong unlan.

• Dili sab maayo nga hugasan ang nawong og init tubig tungod kay makadaot kini sa mga tissue. Mao nga mas maayo nga manghilam-os nga sakto lang ang gibugnawon ug kainiton.

• Dili sab maayo nga mo-settle lang sa pagpahid og wipes o bisan unsa nga matang sa facial cleanser gumikan kay aduna kini preservatives nga makadaot sa nawong.

• Dili gyud angayan nga himuong facial soap ang sabon panglaba kay dili sinina atong nawong. Gawas niana, makaguba kini sa natural hydrators sa atong panit.

• Dili sab maayo nga kanunay nga manghilam-os. Mas maayo og manghilam-os lang makaduha sa usa ka adlaw.

• Inig human og panghilam-os, dili sab maayo nga trapuhan kini gamit ang mga bulingon o tuwalya nga gigamit nimo matag adlaw kay aduna usab kini hugaw gikan sa mga nipilit nga abog. (BANAT NEWS)