Metabolism-Boosting Water Recipes

CEBU, Philippines — Usahay, maguol ka na lang magtan-aw sa mga uso karon nga sinina nga dili nimo masigo gumikan sa nagbabag nga bilbil sa lawas nga makapawala sa porma.

Karon, dili na kinahanglan nga maguol gumikan kay ang www.theheartysoul.com mipabuhagay og solusyon kun unsaon pagpawala sa mga samok nga bilbil sa lawas.

Usa kini ka mga mainum nga giila sa tawag nga Metabolism-Boosting Water Recipes.

Duha kini ka klase sa ilimnon nga mao ang "ginger cucumber water" ug "lemon ginger water" nga makatabang sa pagsuporta alang sa maayong dagan sa metabolismo ug makaayo sa mga nagkadaiyang balatian tungod kay mga prutas ang mga sagol niini.

Nasayran nga ang luy-a makatabang kini sa pagpawala sa sakit sa tiyan ilabi na og wala kini sulod. Dugang pa nga makaayo kini sa mga sakit sa pus-on ilabi na og dug-on ang usa ka babaye. Ug alang sa tanan, makapakunhod kini sa cholesterol nga maoy tinubdan sa heart disease.

Ang lemon usa kini ka anti-oxidant ug aduna kini vitamin C nga maoy mahimo nga mopahilayo kanato sa mga sakit sama sa sip-on ug ubo.

Kining maong matang sa ilimnon, simple lang ang pagama. Mahimo kini nga imintinar matag adlaw o mahimo usab kini nimo nga tambal sa kauhaw aron mas porma ug mas sexy gyud ang lawas kanunay.

Ginger Cucumber Water

Mga gamitunon:

1 ka hiwa nga luy-a

Init nga tubig (gipabukalan)

1 ka kutsara nga honey

8 ka hiwa sa pipino

Proseso:

Sa usa ka garapon, ibutang ang luy-a, dayon ibubu ang init tubig ug pasagdan lang una kini sulod sa lima ka minuto. (Dili pun-on ang garapon tungod kay ilunod pa ang pipino.)

Kuhaon ang luy-a gikan sa garapon

Isagol ang usa ka kutsara sa honey ug ang mga pipino ug kutawon kini ug mahimo na nga imnon.

Lemon Ginger Water

Mga gamitunon:

1 ka kutsara nga gidugmok nga luy-a

Init nga tubig

7 ka hiwa sa lemon

Proseso:

Sa usa ka garapon, ibutang ang dinugmok nga luy-a. Isunod pagbutang ang tubig dayun ang mga lemon. Kutawon kini ug mahimo na nga imnon.