Tomas wa imik panuyak sa SRP

Naglibog si Mayor Tomas Osmeña kun unsay iyang buhaton ning pagtumaw sa mga reklamo kabahin sa nahitabong pagpanuyak sa mga sakyanan nga anha moagi sa South Coastal Road sa SRP karun nga gipa-ablihan na kini sa hingpit sa mga motorista subay sa giluwatang kamanduan sa korte.

Atol sa press conference kagahapon sa udto nagdumili usab paghatag og kompletong tubag sa maong problema ang mayor ug igo lang kining mipadayag nga wala siyay kasayuran sa maong panghitabo.

Apan giklaro sa mayor nga pagkakaron bugtong lang niyang gihimo mao nga mahatagan og igong proteksiyon ang binilyon ka pesos nga propridad sa siyudad, ang SRP, human giisip ni Osmeña nga ang "korte na maoy mi-asumer alang sa pagdumala sa Coastal Road."

Hinoon pormal nang nisang-at og motion for reconsideration sa korte ang siyudad niadtong miaging semana nga nag-kuwestyon sa ligalidad sa gipagawas nga preliminary injunction sa korte nga nagpaabli sa South Coastal Road.

Nasayran nga nang-reklamo ang dili mominos kinse ka mga nanag-iya og sakyanan nga miagi sa SRP human mabiktima sa pagpanuyak.

Apan dako ang pagduda ni Osmeña nga dunay nagpasiugda sa maong binu-ang aron lang mapasanginlan ug madaot ang kridibilidad sa siyudad sa Sugbo.

Hinuon ang labaw nga gikabalak-an sa mayor mao ang uban pang mga binuang ug iregularidad nga mahitabo sa maong lugar karon nga hingpit na kining bukas sa publiko.

Kini sama sa pagpalusot og mga eksplosibo ug mga armas nga anha iagi sa SRP gumikan kay wala nay kontrol ang siyudad pag-regulate sa maong agianan.

Hinuon gipabilin gihapon sa mayor ang walo ka mga sakop sa CIIB nga nadestino sa maong lugar aron mobantay sa palibot sa SRP gikan sa mga badlongon ug uban pang matang sa binu-ang.