Kanhi barangay kapitan sikop sa buy-bust
CEBU, Philippines - Nasikop sa buy-bust operation sa kapolisan ang kanhi barangay kapitan sa Ilihan, Dakbayan sa Toledo nga si Roberto Quindao Campo, Jr., 53-anyos.
Giingong ilado si Campo nga tigpayuhot og ilegal nga drugas sa lugar ug gihulagway nga usa sa mga high value targets kinsa dugay na nga gipanid-an sa kapolisan.
Nakuha gikan sa suspek ang 35 ka gagmay nga putos sa gituohang shabu nga gibana-bana nga mokabat sa P17 mil, P500 nga buy-bust money ug laing P500 nga gituohang halin sa shabu.
Sa Dakbayan sa Danao, nadakpan ang gikatahapang pusher sa buy-bust operation sa Sunshine Beach Resort sa Barangay Guinsay alas 8 pasado kagahapon sa buntag.
Si Police Officer 1 Gypsy Miro sa Danao City Police Station niila sa nadakpan nga si Roseto Pasaje Mayol, 26-anyos.
Ang team nga gilangkuban sa City Drug Enforcement Unit (CDEU) ug mga sakop sa Special Weapons and Tactics (SWAT) ang nagpahigayon og buy-bust operation nga niresulta sa pagkasakmit sa 10 ka gagmay nga pakete sa shabu.
Sa Siyudad sa Sugbo, nasakmit ang dul-an sa P160 mil nga kantidad sa shabu gikan sa suspetsadong tigpayuhot og ilegal nga drugas nga giila nga si Steven Cabreros alias Dwight, 31, taga Barangay Pasil.
Atol sa Oplan Double Barrel: Reloaded nga gipahigayon sa Barangay Labangon, nasakmit sa kapolisan ang 45.06 gramos nga shabu ug buy-bust money nga dul-an sa P2,000 gikan sa suspek.
Samtang sa Barangay Calamba nakuha gikan sa usa ka Aguilla Luceño Tejares ang usa ka medium nga pekete ug 40 ka gagmay'ng pakete sa shabu nga gibana-banang mokantidad og P38, 500.
Nasakmit sab sa Barangay Ermita ang kapin sa P20 mil nga kantidad sa shabu gikan sa usa ka Agustianet Padilla, 39-anyos. Raymond D. Abarcas, Romeo T. Limpangog ug Jemmuel V. Man-on (BANAT NEWS)
- Latest
