BULACAN, Philippines — Kamatayan ang naging kabayaran ng isang 30-anyos na lalaki na pinaniniwalaang hitman ng dalawang grupo ng sindikato na responsable sa serye ng pagpatay sa mga prominenteng personalidad at testigo makaraang mapatay ng mga alagad ng batas sa bisinidad ng Brgy. Guinhawa sa Malolos City, Bulacan kamakalawa ng gabi.
Kinilala ng pulisya ang napatay na sina si Rommel De Leon ng Barangay Hinukay, Baliwag, Bulacan.
Si De Leon ay may nakabinbing kasong murder sa sala nina Judge Oscar Herrera at Judge Jaime Samonte ng Bulacan.
Sa tala ng pulisya, si De Leon ay sangkot sa pagpatay sa testigong si Federico Nacion sa bayan ng San Rafael, Bulacan at sangkot din sa panghahaydyak sa oil tanker sa SLEX sa Taguig City noong Disyembre 22.
Napag-alaman din na kinokontrata ng Apeng Santos Group si De Leon upang likidahin ang mga sagabal na testigo sa operasyon ng sindikato.
Ayon kay SPO2 Gil Punzalan, si De Leon ay naispatang lulan ng Honda Civic (FFW 383) na umaaligid sa bahay ng isa pang testigo sa krimen na si Rodrigo Valdemor.
Dahil nakatunog sa presensya ng mga awtoridad ay mabilis itong tumakas subalit nakorner sa perimeter fence ng NRT at nakipagbarilan sa pulisya. Boy Cruz